今日同屋企人喺九龍食飯，專登留咗啲時間去新開嘅K11行吓。入到去，頭望望，見啲店舖都不外如是係啲大路嘢，諗住影吓相都走。不過，忽然俾啲七彩繽紛嘅首飾吸引住，不其然走咗入去睇。
我對於啲三角幾何圖案不嬲都情有獨鍾，呢間店叫Skalli Paris，係巴黎設計師Jean Marc Skalli嘅作品。店舖放滿咗不同顏色，圖形嘅首飾，有頸鍊，耳環，手鍊等，目不暇給。 Jean嘅設計會用水晶、純銀、琉璃仲有樹脂膠等嘅物料，再加上高技術噴漆同埋特別鑲鑄處理效果，令每件首飾都有獨特嘅紋理同色澤。用嘅顏色好sharp，我特別鍾意佢襯嘅色調，紫加黃，啡加粉紅，藍加綠，有啲撞到飛起，但好巧妙，效果奇佳！形狀方面，有圓形、橢圓形、方形、長方形同埋不規則圖形，拼出嚟有一種協調、對稱又最富美感。
至於價錢方面，非常合理！由於而家on sale，一條要過千嘅手鍊仲有半價添！其餘都有六折！買咗手鍊俾自己，項鍊俾阿妹，仲有隻戒指，加埋一千八，好過啲名店，吓吓都千幾二千一件，仲已經減咗價，我覺得Skalli Paris又化算，啲design又合哂我，值得介紹！
No comments:
Post a Comment