記得某個禮拜日我同阿力响petshop睇中一隻四個月大，好靚女嘅西摩BB，諗住星期一放工去買，點知去到原來已經俾人買咗。新主人阿Rei仲喺度等緊帶佢走，咁當然順便傾傾計啦。阿Rei話我可以上88db.com嘅西摩forum睇，見過有人post話有西摩BB出售。 都過咗一斷日子，三月中某日心血來潮上去睇，真係有post話三月尾會有一胎BB出世，有興趣者msn佢。後來聯絡上Fannie，得知佢對西摩仔女即將生第二胎，今次有四隻，會安排見面。 其實我地都諗過買隻BB由細睇到大，個bonding會好啲。果然真係俾我地搵到。
四月頭終於安排到去Fannie屋企睇BB，當時狗狗都係得兩個禮拜大，兩個都係女。我地企响門口，消毒咗對手，Fannie就攞個盤出嚟，裡面就係BonBon同DauDau啦。兩隻BB打橫瞓咗喺度，size只有比手板大啲，好fragile。當時仲係叫JJ同Heidi，Fannie將啲friend嘅名放喺佢地度。由於太細睇唔出靚唔靚女，唯有睇啲毛色，經過我，JJ，mui，阿力一輪磋商，我地決定要JJ!
努力睇書，上網學點樣養西摩，發覺佢地係超active嘅breed，我同阿力諗諗吓不如要埋Heidi，咁我地返工冇人喺屋企嘅時候咪冇咁悶啦！就係咁BonBon同DauDau就成為我家嘅一分子喇。
