冰凍的十二月

呢兩日簡直凍到震！香港好少去到十度以下，仲要好似roller coaster咁由十八，九度急跌落八度，過兩日由回升返十八，二十度，想病死人咩？ 尋晚真係好甘，一返到屋企好似入咗igloo咁，之後成晚都著到好似露宿者，著哂樽嶺，羊毛襪，包住件圍巾。最衰bon豆上個season咬爛咗條 heater電線，仲無神神條上床賴埋篤pee落張down blanket度，仲唔實行做硬露宿者？

淘寶笑話一則

有一日幫阿力喺淘寶買咗個頭盔，諗住叫佢快快趣寄落嚟，費事臨近聖誕郵遞traffic jam。第二日，佢哋打電話俾我（國語人）：

店員：請問陳xx導遊在嗎？
我：urrrrr，我就是陳xx，不過我不是導遊。
店員：噢，可能我攪錯了，有另一個香港的陳小姐是導遊。
我：（％＄?＆＃?％＠＃）
店員：陳小姐，關於您的貨件，很抱歉，我幫您寄出時寫錯了地址，貨件現正寄去內蒙途中
我：啊（冇嘢吓話....）為什麼會弄錯？
店員：不好意思，我昨晚沒睡過，頭有點混亂
我：（混脹就真！夠膽死俾個冇filter過嘅答案我, 咁都得？）那您給我寄另一個吧
店員：不行，您要的size只有一個，要等那貨件從內蒙寄回來再發給您，大概四天後就送回這裡。
我：.............. 唔該哂！

今日是好日

好奇怪，喺我哋呢行，尤其我認識嘅同行裡面，都好信邪。嗰日係好日嘅，就會事事順景，每個call都係positive！ 今日好有feel呀，已經有好幾個good call，咁就要把握住呢啲好運，make多幾個call喇。（唉，以為星期五可以HEA吓添！）

梁文音:我不是你想像那麼勇敢

記得鍾意聽梁文音係睇佢贏出超級星光大道2，所以知佢出第一張專輯就急不及待聽聽。其中呢隻歌聽第一次就被感動喇，睇埋MTV，就更愛。題材幾特別，有意思。

強颱風 鮎魚

呢個世界真係好多嘢係整定！好辛苦先搵到一個weekend大家都得閒過大海，睇show，大家都熱切期待中之際，話有個世紀超強颱風殺緊埋嚟，仲話打到正，應該星期五，六到添。而呢個風仲要係世界歷史上入五大嘅超強颱風，好似講到好大件事咁！唉，早啲到，遲啲到，我哋都仲有個盼望啊！不過話雖係咁，都仲有兩日先知，又有據聞好似風速慢咗，會delay咁話喎，係就好喇！








(後記：好彩天公造美，鮎魚游咗去第度喇，仲要一啲打風後症候群都冇，又冇雨，又唔大浪，haphap！)

星期日週記

星期日週記：拎住大袋細袋，混亂間跳上的士，發覺司機背影激似麻原彰晃， 頭髮一餅餅，指甲長過手指。望吓個司機証，完全兩個人！日光日白，冇事嘅。只希望搵到exact change，唔駛找錢。其間幾次自言自語，好似念咒咁！落車後連管理員都話，嘩，個司機咁肉酸嘅.....

事業線

今年我嘅事業線都確實發展得幾好！咪誤會，我指嗰條事業線唔係近排用嚟形容女士心口嘅「深坑」，係真係喺我手掌上嗰條呀！

超錯金鐘獎

金鐘獎～創於1965年，乃台灣傳播媒體嘅最高獎項，亦係台灣傳播媒體業界一年一度嘅盛事。以往攞得獎嘅演員同埋劇集/節目都有番咁上下，同埋大家會心服口服。今年年頭好一套「下一站，幸福」喺亞洲都不知幾咁賺人熱淚, 喺大家嘅歡呼喝采之中，竟然喺今年金鐘獎入圍名單得個吉，僅僅入圍咗行銷獎咁大把，點都有啲唔服。但係最唔服係其他嘅入圍名單。好似女主角咁，搵唔到安以軒個名之際，竟然有楊丞琳 - 海派甜心？唔係啩？故事，角色超低能，唔知點樣發揮到佢嘅演技？睇到差啲掟爛部電視喎！仲有白歆惠？佢啲演技喺「命中註定我愛妳」領教過，唔得喎，勉強得個靚字！

除咗安以軒與獎項無緣外，連Vanness，小小彬都榜上無名，加埋套劇亦入唔到圍，真係俾人鬧都媽媽聲，完全唔make sense，班評審係咪被俾人收買咗呀？ 簡直係超錯！

致 菲律賓康泰旅遊巴被脅持死難者

八位不幸離開咗我哋嘅朋友，雖然我哋唔相識，但我會為你祝福，天主一定會好好照顧你哋，安息吧。我哋嘅導遊MaSa， 請你繼續以開朗豁達嘅性格帶住離世嘅團友遨遊世界.......

回家了，安息吧

今日，終於返屋企喇，呢兩日辛苦你哋喇，香港人都等緊你哋呀，呢度唔會再有恐懼，煎熬，唔會再有痛苦。安心喇。

喺電視螢光幕睇到遺體慢慢咁運送落機，唐英年及家人都送上花圈，我一路凝視電視，眼淚又再次控制唔到咁落下，尤其睇到Masa媽媽，按住靈柩不停叫住阿仔，心真係好噏。再見被槍手釋放嘅三母子送花圈俾離世嘅爸爸，媽媽抱住個女，另一隻手拖住個仔，好堅強咁叫仔女同爸爸講再見，四歲嘅女女好似唔知爸爸已經唔再返嚟，送上寫俾爸爸嘅告別信，揮揮手，bye bye爸爸，喺旁邊嘅哥哥已經哭成淚人。個心真係酸得不得了，連企喺一旁嘅國家代表都不禁落淚。好彩，天公做美，連日嚟黃昏都不停落雨，今晚，天色好清總算令死難者同家屬平安返屋企。

黑色星期一

這幾日來，心靈受到無型嘅創傷。有時，有啲傷，原來唔一定發生喺自己身上，都會好痛，好痛。 星期一，lunch返嚟有同事話馬尼拉有康泰旅行巴被騎劫，整個下晝留意情況，很平靜，沒有報導所講槍手會有所行動，延至放工七點多情況都沒有改變，我心想，都是時間嘅問題，談判過後總應無事。

番到屋企，電視直播現場情況，好似有啲緊張，突然間電視字幕打出來說，槍手已經殺死所有人質。我當時個心跌咗落嚟，點解會咁，明明好地地..... 情況急轉直下，睇見一大班警察，特警等圍住架巴士，唔知想點。 想攻唔想攻咁，有一班喺車尾係咁用鎚仔舂架車，另一個喺車門想綁條麻繩試圖扯開，唔係嘛，捉野豬呀？ 過一陣，另外幾個特警撬開太平門想試圖上車，但俾槍手袱擊，於是退後落返嚟，最荒謬係，佢哋並冇保護工具，赤手空拳諗住對付槍手？跟住，情況進一步轉差，突然，一輪機關槍喺車裡面狂掃，我好驚，究竟車裡面發生咗乜嘢事，好心急，好想知，人質究竟點，眼淚不停咁落下，我，同埋電視畫面裡情況一樣，極度失控。喺咁混亂嘅情形下，突然... 車門有一個人半身掉咗出嚟，好明顯，係一條屍體，仲不停滴血。嗰一刻，我同老公手拖住手，呆哂。我大叫，「佢想玩啲乜呀」，心裡面諗住，佢一定係掉一個人質嘅屍體出嚟示威。在場人士加上新聞報導員都唔知嗰條屍係邊個，大家都只係以眼見嘅事實同埋收到嘅訊息去報導，總之，好恐怖。老公叫我唔好睇，因為可能會有更暴力，更難堪嘅鏡頭會出現，但我好想知車裡面啲香港人點情形，唔想離開。過咗一陣，報導描述，條屍體原來係槍手.......

個心好似定咗一定，事情起碼無得再差落去。於是，周圍嘅警察，記者洶湧而上，圍住㗎車。警察開始上車，好驚，好驚佢哋會抬一具具屍體出嚟.... 我手有啲震，心裡面極度不安。過咗一陣，見到一個活生生嘅人出嚟，我彈起身, 歡呼起嚟，眼淚流得更厲害，「無事喇，有生還者呀！」，心裡希望見多啲人行出嚟，第二個喇，三個，快啲，下一個呢？好，再多一個，兩個... 等咗一陣，再無人自己走出嚟。跟住，警察開始抬出受咗傷嘅人，心裡面不停咁希望，呢啲人只係受咗傷.......

一整晚電視都播住現場嘅情況，心情跌到落谷底，仲未知啲受傷嘅人係生係死，最後，報導話有七人死亡.... 延至第二日，再有一個走咗，總共死咗八個。往後呢幾日，每每睇到啲新聞，insider story，都眼紅紅，要心情平復一啲先可再睇落去。

Yakitori 炭

如果沒有朋友的介紹，我一定不知道這家店的存在。沒有大大的霓虹燈牌，沒有雜誌及電視廣告，只有word-of-mouth，也可吸引食客及吸納一班長期擁護者，包括自己。

沒到過的人一定會被大廈的「大堂」嚇倒。百多呎悶熱的地方，只有一個保安員納悶地看小說。等電梯的時候，會不期然看到旁邊的水牌，三滴汗又會不期然的滴下～ 因為大部份都是日本及菲律賓的clubs，真意想不到有家yakitori居酒屋會藏身於此。

這棟大廈是一梯一伙形式，電梯門一打開，就是Sumi的店舖大門。私房菜的格局，要按門鐘才可以進入。地方裝潢尚可，整個地方有大概十多張桌子，bar的位置又有十多個座位，應該可以容納八十人左右。點了多種串燒食物，由於某些食物份量頗大，所以兩個人share一個order已很足夠，例如牛舌，粟米，等等。不過，最回味可算是它們的signature dish「鵝肝蛋炒飯」！日式炒飯上面有一整片鵝肝，加一隻煎蛋，盛到客人面前以候，侍應會把碗內所有東西兜亂，再分到小碗內。鵝肝味濃厚，飯炒得很香，但由於用油炒加上鵝肝，其實一個order四個人分，每人小半碗已經很足夠。

一試難忘 Holly Brown Coffee

某一個下午，老闆話有好介紹，喺中環士丹利街新開咗一間coffee shop，唔係一般嘅連鎖店，係獨一無二，只此一家嘅店，叫Holly Brown。 據搜集資料得知，Holly Brown喺未開之前已經係城中焦點！超級落重本，無論地段，裝潢，都毫不吝嗇，最厲害就係Holly Brown未開張前幾個月仲打破傳統，用recruiting firm招攬人才，仲重金禮聘咗2009年香港第一屆咖啡師大賽嘅冠軍Tracy同季軍King至Holly Brown坐鎮沖咖啡，真係非一般咖啡店！

Holly Brown喺7月9日開張。兩層高，4,000呎嘅舖，店裡面最有特色係器材方面，採用意大利 Victoria Arduiro 品牌嘅咖啡機。行入啲睇，裡面仲有一部超巨型炒豆機，我睇點都有一噸重！佢哋仲喺澳洲搵咗個炒豆師父嚟，每日新鮮烘焙自家blend嘅咖啡豆添。由於咁大部機，會發出大量嘅烘焙味，所以專情建造咗個強力抽風系統。所以入到去，就算企喺部炒豆機面前，一啲都唔覺得有大油煙味！睇埋個website仲勁，有自家主題曲添呀！

咁點都要講吓「飲後感」，我order咗杯Soy no foam Latte，未飲嗰啲濃郁嘅roasted咖啡味已經非常撲鼻，飲一啖之後就直頭迷上咗佢。最回味係個aftertaste，個鼻噴氣時仲有股濃濃嘅roasted味，一試難忘！由於係飯後coffee，個胃已經冇位放其他嘢！店內其他客人好多都order咗Gelato！淨係望到個counter已經吸引死人，下次都真係要試試先得！

尋獲幾何愛飾 ~ Skalli Paris

今日同屋企人喺九龍食飯，專登留咗啲時間去新開嘅K11行吓。入到去，頭望望，見啲店舖都不外如是係啲大路嘢，諗住影吓相都走。不過，忽然俾啲七彩繽紛嘅首飾吸引住，不其然走咗入去睇。

我對於啲三角幾何圖案不嬲都情有獨鍾，呢間店叫Skalli Paris，係巴黎設計師Jean Marc Skalli嘅作品。店舖放滿咗不同顏色，圖形嘅首飾，有頸鍊，耳環，手鍊等，目不暇給。 Jean嘅設計會用水晶、純銀、琉璃仲有樹脂膠等嘅物料，再加上高技術噴漆同埋特別鑲鑄處理效果，令每件首飾都有獨特嘅紋理同色澤。用嘅顏色好sharp，我特別鍾意佢襯嘅色調，紫加黃，啡加粉紅，藍加綠，有啲撞到飛起，但好巧妙，效果奇佳！形狀方面，有圓形、橢圓形、方形、長方形同埋不規則圖形，拼出嚟有一種協調、對稱又最富美感。








至於價錢方面，非常合理！由於而家on sale，一條要過千嘅手鍊仲有半價添！其餘都有六折！買咗手鍊俾自己，項鍊俾阿妹，仲有隻戒指，加埋一千八，好過啲名店，吓吓都千幾二千一件，仲已經減咗價，我覺得Skalli Paris又化算，啲design又合哂我，值得介紹！

《下一站，幸福》

好少醉心於台劇，睇過嘅一隻手數得出，例如《流星花園》，《敗犬女王》, 《命中注定我愛你》等。冇特別好唔好睇，而《命中》更要「戒凳」十集先到戲肉。不過，好一套《下一站，幸福》，令我對台劇有番期望！

先講未睇前嘅期望。睇住個DVD盒嘅封面，除咗Vanness吳建豪，其他演員都噏唔出個名。女主角「安以軒」，邊度走出嚟架？男女配角更加唔識。可能我少睇台劇，孤陋寡聞都唔出奇，但一定唔係超一線演員。所以，結論係冇特別期望！

有日星期六下晝，無所事事，於是就開嚟睇。故事開始未致於令我廢寢忘餐，但都吸引住我繼續追隨劇情。睇到第四集，眼淚已不自已咁流落嚟。老公見我咁「慘」，本來冇諗住睇嘅佢，都開始睇，仲叫我等埋佢添！結果，我哋係每日放工返屋企開始到凌晨兩點幾，迫住要瞓先肯熄電視，花咗四個晚上，終於好依依不捨咁完成！

而呢個先係一個開始，我地睇完好似好迷失咁，冇哂寄託，老公先再由頭睇多次，我就不停google搵啲人物嘅真身，又睇youtube呢套劇嘅製作花絮，可謂中哂毒...

講吓啲人物哩。因為呢套劇，我本來對Vanness冇乜喜歡唔喜歡，去到「我都有少少鍾意咗佢」！喺劇佢都係懶型，哈，但係角色討好，又有演技，所以加分！

「慕橙」安以軒，未睇真係唔識佢。不過，原來佢出道都有一段時間，不過唔係太有名，大部分都係喺大陸拍劇。我最鍾意係佢對超級識做戲嘅眼，好易懾你入戲。慕橙楚楚可憐可憐嘅角色完全係度身定造俾佢...

小小彬～呢個細路真嚇人！年紀得五歲，但點解可以咁識演戲？有好多場戲都俾佢攪到眼都腫哂，用咗好多盒紙巾！！但始終都係小朋友，有時未必識點去拿捏煽情戲，睇番youtube製作花絮，有啲喊戲都真係要鬧要呃要氹先action到，都戥佢慘！ 初初見到小小彬時，覺得熟口熟面，好似曾經睇過佢演嘅戲。查番佢嘅portfolio，又冇喎！再check，明哂，佢爸爸原來係小彬彬，細細個嚟香港拍過啲電影，唔怪得咁熟面口啦！再講，小小彬同爸爸其實似樣到不得了，如果將兩個孩童時嘅相放一齊，真係以為同一人添!

吳慷仁飾演花托也，原來呢套係佢第一套台劇，但又做得好好喎，見到佢好想攬住佢。嗰種不惜一切，不計較，不問回報咁為慕橙同小樂付出，雖然得唔到慕橙嘅愛，但仍心甘命抵去幫助。咁嘅男人，真係邊度搵？有時喺電視虛構嘅世界仲滿足！加埋首「我以為」，愛死了托也 •♥•.¸¸.•♥•.¸

當然唔可以忽視OST。主打歌同結尾曲都係由丁噹唱嘅，每每聽番，啲情節都湧哂出嚟，又再感動。有一首不可不提，就係品冠嘅「我以為」，呢首「托也之歌」嘅歌詞正正講中托也對慕橙嘅愛護同愛慕，銳心銳肺.

不過，全劇我最欣賞係演員嘅實力。不論男女主角，男女配角，二打六，甚至年紀小小嘅「梁小樂」，都令我動容。不得不讚賞導演嘅細膩拍攝，可能係女人嘅關係，佢對每一個關係，細節，感情，都拍得好仔細，令觀眾嘅心神可以完全被懾住。還記得，我諗番起某啲情節，我會激動都流淚，好似好誇張，但真係冇一套劇會令我有咁深嘅體驗。

網上雜誌

有日click吓click吓，竟然被我搵到呢個site！雖然有啲雜誌唔係每一期都有，但已經係好齊全，亦幫我慳番唔少！尤其係啲唔知買唔買好嗰啲！ 包含嘅主要係日本，大陸，同部份外國雜誌. 由於呢個係大陸嘅website，所以冇香港雜誌睇，too bad！

除咗基本嘅男女fashion雜誌之外，仲有髮型，飾物，家居，手藝，等等....

我的最愛網上遊戲

有時覺得自己都幾「宅女」，因為會為咗玩啲網上game玩到廢寢忘餐，以下係我玩得最多嘅幾個...

1) Room Escape

Room Escape game係喺一個固定環境裡面去尋找到道具，活用邏輯思維走出房間。Room Escape 嘅始祖都可以係 FascoCS 嘅 Crimson Room

以下呢幾個係我頗欣賞嘅room escape 網站:

Mild Escape: 不得不服製作人Tesshi-e嘅功力。頭嗰幾個game啲畫功普通，但越做越好，啲3D graphic 好靚！一讚！

いちご Cafe: 另一個graphic超靚嘅網站，全都以strawberry嚟做主題，又cute又sweet。

仲有好多值得一提嘅靚site，好難一次盡錄，不過都可以喺 Escape Game Org 呢個website搵得到哂！

2) Killer Sudoku

玩完個腦仲攰過返工嘅game。基本上Killer Sudoku嘅規則同Sudoku一樣, 唔同嘅係冇預先填好嘅數字做提示，但有好多組虛線圖形。每一個虛線圖形裡面嘅總和，都要同附有嘅數字相同。除咗sudoku基本嘅技巧之外，仲要運用好多if，then，else嘅腦部programming運作，先可以解題，都咪話唔challenging！

3) iSketch

即係online pictionary。裡面有好多唔同嘅chatroom，每個chatroom最多容納十個player。子細啲睇，chatroom有唔同category, eg. English UK，English US，French, Movies, Songs, Animals等等，適合唔同player嘅喜好！但幾嚴格，例如，如果畫嗰個寫英文字，或有player寫粗言穢語，admin係有權踢個player走！

陳奕迅 x 黃偉文 = 《男人的玩具的系列》

Wyman喺JET雜誌話一路以嚟都為Eason創作咗個暗盤系列《成熟男人的玩具的系列》，包括《葡萄成熟時》~ 酒、《人車誌》~ 車同埋《沙龍》~ 相機，新碟其中一首《陀飛輪》就係講錶。

以下係節錄︰

「... 陳奕迅有一個暗盤系列，連他都是最近才知道，就是成熟男人的玩具，第一集是〈葡萄成熟時〉、第二集是〈人車誌〉、第三集是〈沙龍〉，即將推出的新碟，連腕表都寫了，歌名是〈陀飛輪〉，而陳奕迅不知道甚麼是陀飛輪。」
成件事真係型都爆!!!