黑色星期一

這幾日來，心靈受到無型嘅創傷。有時，有啲傷，原來唔一定發生喺自己身上，都會好痛，好痛。 星期一，lunch返嚟有同事話馬尼拉有康泰旅行巴被騎劫，整個下晝留意情況，很平靜，沒有報導所講槍手會有所行動，延至放工七點多情況都沒有改變，我心想，都是時間嘅問題，談判過後總應無事。

番到屋企，電視直播現場情況，好似有啲緊張，突然間電視字幕打出來說，槍手已經殺死所有人質。我當時個心跌咗落嚟，點解會咁，明明好地地..... 情況急轉直下，睇見一大班警察，特警等圍住架巴士，唔知想點。 想攻唔想攻咁，有一班喺車尾係咁用鎚仔舂架車，另一個喺車門想綁條麻繩試圖扯開，唔係嘛，捉野豬呀？ 過一陣，另外幾個特警撬開太平門想試圖上車，但俾槍手袱擊，於是退後落返嚟，最荒謬係，佢哋並冇保護工具，赤手空拳諗住對付槍手？跟住，情況進一步轉差，突然，一輪機關槍喺車裡面狂掃，我好驚，究竟車裡面發生咗乜嘢事，好心急，好想知，人質究竟點，眼淚不停咁落下，我，同埋電視畫面裡情況一樣，極度失控。喺咁混亂嘅情形下，突然... 車門有一個人半身掉咗出嚟，好明顯，係一條屍體，仲不停滴血。嗰一刻，我同老公手拖住手，呆哂。我大叫，「佢想玩啲乜呀」，心裡面諗住，佢一定係掉一個人質嘅屍體出嚟示威。在場人士加上新聞報導員都唔知嗰條屍係邊個，大家都只係以眼見嘅事實同埋收到嘅訊息去報導，總之，好恐怖。老公叫我唔好睇，因為可能會有更暴力，更難堪嘅鏡頭會出現，但我好想知車裡面啲香港人點情形，唔想離開。過咗一陣，報導描述，條屍體原來係槍手.......

個心好似定咗一定，事情起碼無得再差落去。於是，周圍嘅警察，記者洶湧而上，圍住㗎車。警察開始上車，好驚，好驚佢哋會抬一具具屍體出嚟.... 我手有啲震，心裡面極度不安。過咗一陣，見到一個活生生嘅人出嚟，我彈起身, 歡呼起嚟，眼淚流得更厲害，「無事喇，有生還者呀！」，心裡希望見多啲人行出嚟，第二個喇，三個，快啲，下一個呢？好，再多一個，兩個... 等咗一陣，再無人自己走出嚟。跟住，警察開始抬出受咗傷嘅人，心裡面不停咁希望，呢啲人只係受咗傷.......

一整晚電視都播住現場嘅情況，心情跌到落谷底，仲未知啲受傷嘅人係生係死，最後，報導話有七人死亡.... 延至第二日，再有一個走咗，總共死咗八個。往後呢幾日，每每睇到啲新聞，insider story，都眼紅紅，要心情平復一啲先可再睇落去。