萬寧廣告

好欣賞近期「萬寧」嘅新廣告，係一個小妹妹覺得sales哥哥對佢好好，仲「有少少鐘意咗佢」添。我第一次睇個廣告之後個心突然軟咗一軟，好似溶化緊嘅感覺。個tvc好sweet，好warm，Winky （後尾知道個小妹妹叫Winky王允祈）好cute，完全係令你會心微笑嘅廣告，一絕！

其實「萬寧」上一代亦有個用小朋友嘅廣告，嗰個男仔好精靈，好cute，加上佢background music又輕鬆有趣，令人睇完會回味，啲melody仲會喺腦裡面不停咁轉添。

教我如何不想他

近排身邊重要嘅人發生咗一啲事，雖然對我嚟講唔係世界末日，話哂做人都做咗咁多年。但對於啲溫室長大嘅人，感情出現問題又的確幾慘情。

如果以一個過來人身份嚟講，感嘆「問世間情是何物」係何等容易，呢啲事幹永遠都係旁觀者清，勸人嗰個永遠都可以理直氣壯咁講。

所以喺呢次事件發生以嚟，我都係抱住正面同樂觀嘅態度對住佢。好似另一個朋友話齋，唔通出到嚟攬住哭哭啼啼咩。基本上就想俾啲正面啲嘅信息話佢知，再咁負面諗落去都於事無補嘅時候，不如退一步，可能真係海闊天空呢。

唔知件事會last幾耐，不過呢段日子，見到有咁多人support佢，都有啲安慰，起碼有啲朋友會主動安排啲活動occupy佢啲時間呀。我諗宜家嘅佢仲未感受到呢種溫暖，淨係知道有野做，塞住啲時間，夠鐘就行屍走肉咁去參與，唉，我見猶憐。

我有兩句左右銘：「一樣米養百樣人」，要知道冇兩個人係一樣，人亦唔係麵粉，唔會俾你磋圓禁扁變咗你心目中嘅形狀，所以要識包容。接受呢個世界係有好多唔同嘅人，所以當有唔怯意嘅事，諗清楚係咪咁值得去嬲先？

第二句係「世界唔係圍住你轉」，唔會永遠事事都如意，好嘅事永遠都喺你身邊咁着數。

當我置身於旁觀者嘅位置先睇到，人性關係真係好複雜，好矛盾，好亂！未必一定講緊感情，就算係喺同事或者朋友之間都係。原來有啲時候，人會講一套，做一套，仲要好理直氣壯。唔知點解，總覺得人好鐘意將啲事情小事化大，簡單複雜化。

我自己經好多事，長好多智之後，心態真係有好大轉變。

不過近排有好些事件令我有所體會。因為facebook，啲人好鐘意放啲感想呀，status update上去，睇到原來好多人都表面風光，內心好多不滿同失落，尤其有啲couple，會突然放個comment好似「點解男人咁鐘意同女人講大話」，或者「我應唔應該放棄」，仲有啲激動啲嘅「真係好嬲 ... 嬲咗幾個鐘仲嬲緊, 情緒仍然激動」。兩個人好好地變成咁，仲要挖出嚟俾全人類知，幾咁可悲，幾咁可憐，仲有，幾咁肉酸。

我諗，係因為大家嘅執著，又唔肯平心靜氣去傾，往往都係火爆咗先，投訴，火爆，再投訴。另一方，就算真係自己錯，俾對方咁不停炮轟，條氣又唔順，於是雙方開火，做成咁嘅局面。

Facebook

Facebook 係一樣好矛盾嘅 online tool，佢既可以令我搵番好多失散多年嘅朋友，知道一啲唔係成日見嘅朋友嘅update; 亦因為乜都網上攪掂，變相令人與人之間疏離咗，因為見都唔駛見啦，留個message咪得咯！話雖如此，每日開 facebook，都會有啲令我覺得煩厭嘅 items。Well，純粹個人喜惡，如踩親條尾，敬請見諒！
1）煩爆 Status Update
Update 吓 status冇問題，但唔係下下都update住你做緊乜啩。「Just jogged for 20 miles on treadmill」又寫，下個鐘「watching Crimson Break」，又下個鐘「肚餓，食飯先」.... 我諗 status 係俾你話俾人聽一啲事，想人地俾意見，或者係突發/奇特事件，想同人分享，請問你跑咗幾多miles，肚餓想食飯，關人乜事呢，你想人俾啲咩反應你呢？仲要係日日update幾次，好悶呀！
有啲 status 又懶詭秘，「...so sad today」，又唔講埋落去，等啲人不停咁問「what's wrong」？係咪想知道有幾多人關心自己呢？冇人回應咪好瘀？通常呢啲都係自傷自憐，好少真係有乜咁傷心。

仲有仲有，「...Today is Friday」，唔該，可唔可以講啲我唔知嘅嘢！

2) 乜相都擺
有啲人真係去到邊，影到邊！唔緊要，不過唔該screen過先好post啦。食飯相，餐餐post，去茶餐廳又post，去飲茶又post，返阿媽屋企食飯都post，就連落街篤串魚蛋都post，都幾煩。同埋可唔可以唔好咁懶，整理吓啲相先啦，同人同地點同一個spot都可以影十幾張，只不過係擺唔同嘅甫士！

3）心理測驗
當然，唔係一竹篙打沉一船人，我自己都有玩。但係每次打開facebook，就梗有某幾個人不停將啲心理測驗結果post出嚟，我就不停咁 Hide 哂啲 test，你係「九型人格」邊一格自己知咪得咯，唔駛唱通街話俾人知。你係咪想有人肯定你係啲咁嘅人，又或者知道原來你係啲咁嘅人！？

另外，有啲test都幾無聊，好似嗰啲「你係大內密探零零發」裡面邊個角色，諗呢啲 test 出嚟嗰啲都有問題嘅，我係「天外飛仙 ~~」咁又點？有幾好玩？仲有啲仲離譜，「你究竟幾時死」，知咗係咪可以攪定身後事？不過最攪笑係個test結果話，原來自己已經死咗.....

4）儲 friend
點解有啲人會有2000個friend嘅，真係咁多？不過我唔鐘意啲人亂咁add人，都唔識，add乜呢？add完又係咪真係friend咗先？我見有啲男仔，佢有好長嘅friend list，不過好多都係啲搔首弄姿嘅女仔。我會懷疑，你啲friend全部都咁擺pose呀？唔咁擺pose唔俾做你個friend呀？咁好肯定佢係好似儲閃卡咁儲啲靚女，等其他人羨慕有咁多靚嘅女性朋友啦。

5）Photo Tag
呢個function都幾驚！有時唔知邊時邊日俾人影咗啲好核突嘅相，仲俾人tag埋，而禮貌上，又冇立即detag，要等到個album冇人評論先detag到，咁唯有set話某啲人睇唔到人地tag我啲相啦，之但係又有啲相係想俾人睇到嘅，變咗要download張相，再post喺自己個album度先得，煩到爆！ 不過，最最最煩嘅，如果自己俾人Tag咗，之後跟住嚟嘅message，無論識佢唔識佢，啲message都會係notification出現，炸爆你為止！

劫後餘生16小時

尋晚真係永世難忘。颱風巨爵襲港，下晝四點幾已經講定六點會掛八號風球，所以好早就返咗屋企。夜晚啲風勢越來越勁，兩隻狗已經超不安，好alert。到十二點幾諗住瞓，叫埋小狗入房。房嘅牆又試滲水喇，真係煩，諗緊點索水之際，客廳無啦啦有聲好似爆炸嘅巨響，俾佢嚇一跳，咁睇吓發生乜事啦，一出去，O哂咀，見到廳嘅窗穿咗兩個窿，周地玻璃，嚇到我地傻咗。

未深入睇吓破壞力有幾強，表面望落去已經好頭痛。唉，今晚唔駛瞓啦！有個大窿，啲風同雨係咁飄入嚟，外面八號風球，又唔知搵邊個求救，真係束手無策！諗諗吓，橫掂點遮都遮唔到啲風，不如索性執哂窗口附近啲物件走，再用膠袋遮住啲搬唔開嘅音響櫃。一邊舖就一邊執番啲大塊嘅玻璃碎，最後放兩塊大毛巾墊地索水。最攪笑就係當我地一路舖膠袋嘅時候，一聽到啲風吹緊埋嚟，我地就九秒九衝返入房，點知會唔會有第二次先，狼狽到爆。

之後，塞住個itouch，大被衿過頭。我知阿力每隔一陣就出去視察吓災情，我真係有心冇力。

Bon同Dau由頭震都尾，Bon最先走入個籠避難，後尾Dau都跟埋佢入去。成晚都唔俾佢地出嚟，因為周圍都係玻璃，唔小心食咗就首尾長喇。Bon係驚青啲嗰個，個身震足成晚，好慘！

第二朝七點幾check仲係八號波，於是繼續瞓。十一點，終於落番三號喇，不過都無諗過返工，因為真係有排執，淨係要清理番啲玻璃都好大工程。業主Edmond同Esther先後嚟探班，最好笑Edmond睇完災情之後同我地講唔好意思，哈，乜係你做㗎？ 唔駛唔好意思喎，天災，邊個想㗎！ Esther帶咗鋁窗師父阿昌哥嚟睇，佢後尾出去幫我地搵合識嘅玻璃，搵咗成個鐘，由銅鑼灣行到灣仔先搵到，都算唔話得，因為佢好少做啲咁細奀嘅工程。

昌師父好勁，一個人由拆窗框，嵌番塊玻璃，噴膠一腳踢，個幾鐘攪掂哂。之後落嚟就係我地還原間屋嘅時候。 用咗成個下晝去清理，吸塵，抹嘢！不過諗番，算啦，當俾自己一個藉口清吓間屋。 諗番轉頭，不幸中之大幸。發生事前五分鐘我仲坐喺廳度，好彩一早叫哂B and D入房，又好彩地件不明飛行物體冇打正我地間房，如果唔係就一定有人或狗受傷。多得天主保祐。

Mika

前幾日坐車時聽收音機，DJ播番Mika喺2007年出第一隻碟時嘅主打歌「Love Today」，之後到今日首歌都仲喺個腦不停咁播，所以專登搵佢個video嚟睇，越聽越好聽，好七十年代嘅feel。Mika啱啱出咗第二張專輯 「The Boy Who Knew Too Much」喇！

其實都好鐘意另一首喺第一隻碟「Life in Cartoon Motion」嘅歌「Lollipop」，聽完好happy！

Blogger Templates

由六月份開始製作我個人blog之後，已經不停物色唔同嘅templates。我希望我嘅blog比較個人化啲，例如希臘旅行嘅就用陽光與海灘，夏天北海道就用薰衣草等。至於我個人嘅blog始終係未搵到合心水嘅。Download咗template之後我亦會私自改layout同啲codings，務求做到非常個人化，又代表到我自己。因為咁，我都希望將啲好嘢公諸同好，所以以下係一啲值得去參考嘅網址，除咗templates，仲有關於coding 嘅一啲基本知識同技巧。

AllBlogTools

一個幾清新嘅版面，展示嘅 templates都唔會太大路。亦包括Blogger 嘅tricks。

Pyzam

Pyzam除咗有超過一千個blogger templates之外，仲有其他唔同種類嘅templates，好似MySpace，Frienster Layout，Hi5等等，好齊全！

Deluxe Templates

同 AllBlogTools差唔多，templates嘅design都係屬於比較elegant啲

莫非定律

有冇聽過「莫非定律」Murphy's Law？ 簡單啲講， 就係指「任何有可能出錯嘅事將會出錯 (Anything that can go wrong, will go wrong)」。亦都係表示「所有嘅程序都有缺陷」，或者「若缺陷有好多個可能性，佢必定會向最壞嘅方向發展」。睇完「莫非定律」嘅定律以後，我就變咗個呢個Law 嘅信徒，忠心不二。

「莫非定律」可以apply落好多生活細微嘅事情上面。講啲活生生例子: 今朝比平時遲咗幾分鐘出門口，當我行緊去巴士站途中，我見到我搭開嘅 No.5S 巴士啱啱走咗，落到山腳，連No.1都走埋，心諗，兩架車都唔同總站開出，但次次都咁啱一齊到，唉，諗住慢慢行，起碼都要等多五分鐘先再有車啦，點知一轉彎，第二架5S將要離開個站！激到我彈起！ 係咪咁邪呀？攪到要呆等多十幾分鐘先再有車，仲要係我麻麻地想搭嘅 No.1。 個定律就係咁解，你越唔想佢發生，佢就偏要發生。你冇諗過咁壞後果咩，就真係發生俾你睇。

又或者，落到地鐵，架車度門開住咗，當個腦仲諗緊衝唔衝過去之際，個身已經跑緊過去，永遠就係當你隻腳將要踏入車廂嘅一刻，車門就閂埋，尷尬到爆。最記得有一次，揸住hand carry上機鐵，驚住佢就嚟閂門，著住拖鞋都衝過去，點知煞唔切制，成隻鞋飛咗出去，差啲跣咗落車同月台之間個罅度，好彩月台邊為失明人士而鋪設嘅黃色凸線救咗一命，不過已經瘀爆啦！

話咗「莫非定律」係可以放喺任何一個生活情節裡面，你可以click入去Murphy's Law official site度，搵到幾多發生過喺你身上嘅事？以下幾個我覺得幾攪笑，但好啱聽嘅。

• 六合彩頭獎四千萬而你終於中獎，但同時你亦發現同樣中頭獎嘅幸運兒有三千個
• 打golf時，越多人睇住你發球，你嗰球就打得越衰
• 落雨唔洗車，一洗就落雨
• 每一個問題嘅解決都會引發新嘅問題
• 你唔見咗嘢，最先去搵嘅地方，通常都搵唔到，但偏偏亦可能真係喺呢度，不過你冇搵清 楚。反而，你會有機會搵到嘅唔係你諗住搵嘅嘢

不過，又掉番轉嚟講，我地亦可以好樂觀咁諗：「任何有機會成功嘅事都會成功」，個定律冇講明件事一定係必好定必壞，放喺管理學角度睇，俾啲管理人知道，可以發生嘅事，總會發生，咁就可以對所有可能發生嘅事做好周全嘅準備。

終於病倒了

上星期五開始喉嚨痛，以為係狂食淡水蝦條後遺症。星期六打牌日，不停流鼻水。星期日，開始咳嗽，哈，仲唔係豬豬病發？ 好驚，星期一冇返工，打去養和book時間，啲曹醫生放哂大假，呢啲普通科，冇所謂喇，最緊要check到有冇事。 即刻諗，死啦，如果要quarantine一個禮拜，咪冇得睇Gary嘅concert？講真，唔驚係咪真係中招，因為呢個已經唔係不治之症。不過要隔離咁多日就唔係咁爽啦。好彩去到醫院探熱並冇發燒，嚇得一陣陣！

其實我已經好小心日常生活唔好俾身體收到感染，真係講就容易。基本上我連銅鑼灣都唔係好敢出。香港而家吹嘅風又熱又悶，而室內啲冷氣又凍到停屍間咁，真係點頂先？再唔改善空氣質素，我地呢啲呼吸道渣嘅人就會好辛苦。坐巴士返工就冇得避免，而巴士冷氣又係凍到不得了，同外面溫差爭咁多，真係唔病就有假。

土司工坊 Toast Box

每次去新加坡做嘢或者旅遊時都總會預留一啲時間去食 328 加東喇沙, 同埋到啲hawker center 或者kopi tiam 食kaya toast。當知道Times Square B2 將會開純南洋風味嘅土司工坊，真係好興奮！ 開幕以嚟光顧過好幾次，食物質素雖然未及得哂新加坡，不過我覺得合格，最鐘意係Pandan Cake同埋喇沙。雖然網上有啲人俾喇沙分數好低，話啲粉點解係米線，又話喇沙應該係用匙羹食，冇理由用筷子等等。但我覺得佢湯底真係唔差，所以會繼續幫襯。不過我想講吓嘅係佢地營運上嘅問題。當然，喺呢度講得嘅梗係投訴啦！以下幾點係綜合咗我呢幾次所得嘅結論:


1）人手分配
餐廳係自助型式，除咗有賣基本食物以外，仲有一個櫃係賣bakery嘅。但係，收銀機就只得一個！無論你想買嘢食，買嘢飲，定係淨係想買個飽，都要排嗰行隊。嗱，問題就喺度喇。嗰個負責收銀嘅，落咗order，如果係熱飲就會pass俾另一個staff做，但凍飲好似barley water或者bakery就會佢負責埋，明明後面有其他人走嚟走去，點解唔叫佢地幫手，等佢可以快啲接下一個order？而得一個cashier就更加有問題，如果部機有乜事又或者落錯單就仲麻煩，閒閒地起碼要排十至十五分鐘先可以落order。試過好幾次行過淨係想買件Pandan cake走，但見條隊咁長，都係咪攪，咁就流失咗一個客，咁你話當中冇咗幾多生意呢？ 我覺得大家樂嘅set up好好，一邊排隊買飛，一邊就預備食物，大家有自己崗位。我明地方唔大未必可以有咁嘅luxury，但點都應該整多一部收銀機咯，話哂都係人多嘅銅鑼灣區，點都值得投資啩？


2）無理收費
有一次叫咗西多，見到件多士上面有塊厚牛油，但冇糖槳，亦冇除碟附上，於是就叫阿waiter哥哥攞啲嚟，佢竟然話，要加兩蚊喎，吓？ 乜西多嘅牛油同埋糖漿唔係一個default嘅配搭嚟咩？定係我見識少，南洋嘅西多本身係冇syrup嘅呢？不過咁都未算，原來問攞杯水都要收兩蚊，有冇咁過份呀？


3）黑面員工
嗰度嘅員工基本上要全部拎去再培訓！冇一個嘅面口係歡容嘅，全部都好似你殺咗佢全家咁。叫佢地執一執張枱，一係就聽唔到，一係就萬般不願意。記得有一次我地叫咗喇沙，個waiter哥哥由於睇唔到我地放咗喺枱嘅號碼牌，佢攞住兩碗粉行咗個圈，我地又唔肯定嗰兩碗粉係咪我地嘅，咁咪叫佢過嚟問係咪我地咯，嘩，佢個樣真係嚇死我，睇得出佢心裡面係講緊十八個字操口，好似責怪緊我地唔早啲叫佢過嚟。佢放低時我幾想講唔好意思喎！

4D超立體巨幕影館

前日約咗朋友去機場T2嘅 "4D超立體巨幕影館" 睇 "Up"，喺香港從未試過睇3D戲，莫講話4D啦！ 一向都好鐘意Pixar嘅製作，今次有新戲上再加上4D特技，所以真係好期待！ 一入場每人派一副立體眼鏡，全場坐位好似話有360個，個館仲擁有全亞洲最大的4D屏幕，真巴閉！

套戲我唔詳細評論，不過都係一套值得睇嘅戲, 但又未至於Toy Story呀，Monster Inc嗰啲咁精彩，但都有幾個感人位，我同有啲朋友都睇到眼濕濕。 有啲睇過3D戲如Transformer就話呢套戲唔得3D，即係冇乜飛嘢出嚟你要避呀，衝嚟衝去你要搖埋一分嗰啲位，只係一套正常立體movie。而4D位呢，都有少少夾硬營造氣氛, 例如吹bubble，放乾冰，吹氣，噴水等等，standard啲啦。

不過同同事傾開，原來其他3D館嘅價錢都幾貴，好似IMAX就要$120一張，而T2呢個影館都係$50-70。但係當然有負面嘅因素，就係無論揸車定坐車，加埋過路費，泊車等... 路程遠, 價錢都唔平！不過我都覺得係一個值得去嘅地方! 總之都係一套值得睇嘅戲。

500年一遇的日全食

五百年先遇到時間咁長嘅日全食可謂轟動全球，知道中國好幾個地方都係睇日食嘅最佳地點，例如長江流域一帶。我今日返工都唔記得望吓個太陽有冇俾月亮食咗，事關香港嘅日偏食可能太偏，完全唔覺有暗咗嘅情況，係直至朋友Steve through MSN send咗個file俾我先記得。佢而家咁啱base喺武漢做事，喺office就正正睇到日食，完全唔駛好似其他人咁，勞師動眾北上去追日。呢個係Steve send俾我嘅video。

而呢張相喺我表弟喺屋企影嘅。呢個日偏食都好清楚喎！

二十三年後的重逢

尋晚有個壯舉, 就係見返自小六以後再冇見過嘅同學仔。Bonding呢樣嘢好神奇，明明廿三年冇見，但一見返可以雞啄唔斷咁傾計，講返以前小學嘅人與事。我有時都好佩服我嘅記憶力，真係會記得中文名，英文名，其實仲會記得佢地幾號number，不過冇話佢地知，費事嚇親就唔好啦！我細個都幾奇怪，會記埋啲港姐名，幾多號number等等！ 真喎，張曼玉29號，袁詠儀11號，李嘉欣4號呀嘛！

聽返佢地講，我小學原來好出名--百厭！ 我操行不嬲唔好，不過係男仔頭啲之嘛。最鐘意同郭永禎同埋賴靄欣三個扮小雲小吉通處跑，我又鐘意傾計，明明唔係最矮，俾老師要我坐第一排睇實我，一講嘢就罰。最記得有一次，我不過轉個頭去隔離個同學仔度，都俾老師叫我個名罰企，我諗佢以為我又想講嘢。最過份係啲老師點解會去隔離班講我是非嘅？ "呢，隔離班嘅陳曼宜又俾人罰喇..." 攪到阿莊婉儒靜靜雞就嚟睇吓邊個係陳曼宜，激死！

我地六個又講是非，仲記得有個女仔叫麥超倫，阿黃美儀話佢最鐘意放屁同攞住個背心膠袋，哈，Jesus！ 我話麥超倫仲有個妹叫麥崑倫，仲同我個妹一班，佢地話我亂噏一通，哈！

曼谷 Center Point Massage ＆ Spa

同事最近到過曼谷試咗喺Silom新開咗分店嘅Center Point Massage & Spa，覺得物超所值，因為有買一送一優惠。於是，今次就加插咗喺呢個曼谷trip裡面。

Menu上面有個3.5hr, 不過係 2500baht 嘅 massage plan。買一送一計，每人1250baht，即係港幣唔駛＄250，真係好抵！

坐BTS去非常方便。喺Sala Daeng站Exit 1出，唔駛過馬路，行經Patpong Night Market到Soi 6，轉入去就望到。

Center Point Massage & Spa, Silom Branch
128/4-5 Silom Soi 6, Silom Road,
Suriyawongse, Bangrak, Bangkok 10500
Tel: (662) 634-0341 to 2 E-mail: cpms@centerpointmassage.com
Open daily: 10:00 am-01:00 mn with the last booking at 11:30 pm

我的爆炸日記

常常給別人嘲笑為"投訴王"，所以決定開一個blog舒發這些令我氣到爆炸的軼事。

Go to Blog -> 我的爆炸日記

發夢一則

有無發覺, 經常會發啲好奇怪嘅夢? 最痛苦係唔知點解成日會miss flight，追車呀等等。呢晚呢，我夢到自己入咗Oxford U嘅音樂系，仲係排緊隊入hall做freshment registration，真攪笑。唔知係咪公司近期每個new hire都有master degree所以有所壓力 (連Executive Assistant都有MBA)，先發埋啲咁嘅夢。哈!

講完 ～～

愛上needle-felting

到北海道札幌嘅旭屋書店，鐘意搜羅啲關於handcraft嘅書，今年初就買咗兩本不織布工藝書。不過返嚟，睇睇吓覺得啲蛋糕唔夠真，又好多手工（又針線，又綿花），後尾發覺用針桔羊毛毯做嘅蛋糕真過用絨布，亦係銅鑼灣搵到一間專門賣手工藝材料嘅上樓舖添。

我最鐘意自己整嘅呢兩件蛋糕

作品圖片Link