泰拳班 II

上次提及泰拳班係好幾個月前，數數手指，都打咗七個月。對呢個運動，只可以講越嚟越愛！由一個禮拜打兩至三日，到現今去四至五日，仲每星期上多堂私人課，越打越起勁！泰拳，除咗好老土咁話強身健體之外，對我嚟講，真係幫助我解決本身積存嘅身體問題。以往都有做運動嘅我，流汗只限於啱啱做完運動，其餘時間想搵滴汗都無！就算三十幾度行街，都只係覺得熱，未至於汗流浹背！但係，上星期喺屋企，飲完碗熱湯，竟然大汗夾細汗，自己都覺得，神奇！
私人課，一向都覺得自己未夠份量去嘗試，我班中鐵腳因較早前要開concert，所以一個人上咗十幾堂，佢覺得我絕對可以嘗試。於是，兩星期前，仲捉埋我一齊上！不得了，絕對係力同鬥志嘅表現。由於教練出名係「魔鬼教官」，一小時嘅課程一啲都唔可以hea！就算幾辛苦，幾想休息，未踢完，未打完，絕對唔可以行開！呢啲意志力係自己做gym無辦法做到。明明覺得已經去到limit，教練話左右腳踢多二十下，個小宇宙唔知喺邊度爆發出嚟，原來係可以再繼續落去！呢個滿足感真係非筆墨可形容。warm up，對打，沙包，攞命sit up，時間過得好快！最開心係教練話我哋好夠氣同尚算力度大，佢最鍾意打到啪啪聲喎！不過，對我嚟講，搵到樣自己鍾意，又會持之以恆嘅運動就最滿足！


呢個星期「拳王」剛播出，肯定會帶嚟一股泰拳熱，希望想學嘅人唔好抱住「好型」所以學嘅心態，因為唔放心機落去，型唔可以型好耐！

良心車仔麵 -「鍾記粉麵」

以往食開車仔麵，好自然淨係識去新記，因為喺銅鑼灣旺區嘅車仔麵店唔多。不過自從幾年前佢哋將啲食材縮水，變相加價之後，我就少咗去。有晚十一點鐘，掛住天后華姐嘅清湯腩，點知已關門大吉，行行吓見到有間車仔麵，於是就去試試。

呢間「鍾記粉麵」細細間，幾張枱加一排bar枱位，總算乾淨。點餸紙上都有一啲其他少有嘅食物例如魚腐，獅子狗等。碗車仔麵嚟到真係好開心，有番初戀嘅感覺。原因係，而家啲車仔麵嘅餸太太太的骰，貢丸魚蛋好似麥提莎咁丁粒，牛肚一開三當三片，確實令人氣憤！「鍾記」呢啲就真係有良心，所有餸都大大件，起碼俾番原本嘅size。味道亦唔差，當然，食完好口乾，皆因味精太重，無計！但＄32五個餸，送生菜，仲想點呢！