良心車仔麵 -「鍾記粉麵」

以往食開車仔麵，好自然淨係識去新記，因為喺銅鑼灣旺區嘅車仔麵店唔多。不過自從幾年前佢哋將啲食材縮水，變相加價之後，我就少咗去。有晚十一點鐘，掛住天后華姐嘅清湯腩，點知已關門大吉，行行吓見到有間車仔麵，於是就去試試。

呢間「鍾記粉麵」細細間，幾張枱加一排bar枱位，總算乾淨。點餸紙上都有一啲其他少有嘅食物例如魚腐，獅子狗等。碗車仔麵嚟到真係好開心，有番初戀嘅感覺。原因係，而家啲車仔麵嘅餸太太太的骰，貢丸魚蛋好似麥提莎咁丁粒，牛肚一開三當三片，確實令人氣憤！「鍾記」呢啲就真係有良心，所有餸都大大件，起碼俾番原本嘅size。味道亦唔差，當然，食完好口乾，皆因味精太重，無計！但＄32五個餸，送生菜，仲想點呢！