回家了，安息吧

今日，終於返屋企喇，呢兩日辛苦你哋喇，香港人都等緊你哋呀，呢度唔會再有恐懼，煎熬，唔會再有痛苦。安心喇。

喺電視螢光幕睇到遺體慢慢咁運送落機，唐英年及家人都送上花圈，我一路凝視電視，眼淚又再次控制唔到咁落下，尤其睇到Masa媽媽，按住靈柩不停叫住阿仔，心真係好噏。再見被槍手釋放嘅三母子送花圈俾離世嘅爸爸，媽媽抱住個女，另一隻手拖住個仔，好堅強咁叫仔女同爸爸講再見，四歲嘅女女好似唔知爸爸已經唔再返嚟，送上寫俾爸爸嘅告別信，揮揮手，bye bye爸爸，喺旁邊嘅哥哥已經哭成淚人。個心真係酸得不得了，連企喺一旁嘅國家代表都不禁落淚。好彩，天公做美，連日嚟黃昏都不停落雨，今晚，天色好清總算令死難者同家屬平安返屋企。