上天眷顧的滑雪之旅

剛剛跟朋友到妙高高原滑雪五日，一年一度大班人去玩，日日吃喝玩樂，諗返都開心！

不過，呢個旅程並唔係事事順利，有好幾個小風波，之不過，有上天嘅眷顧，大事化小，小事更加變冇事！

我哋一行十二人，租咗三架七人van，到達成田機場時攞車。Online 預約時並冇加租雪軚選項，所以諗住攞車時先詢問。但租車公司話我哋應該租咗之後打電話要求加租雪軚，宜家先問就太遲。咁我哋就揸住四季軚，浩浩蕩蕩由成田出發到位於新潟縣嘅妙高高原。我哋住嗰間高級酒店位於山上面，要揸一段斜坡先可到達。由於第一日到達時已兩日無落雪，路面一直都冇問題！

第三日決定過山到杉之原滑雪場玩，沿路都有一段小斜路，都冇問題！當日下晝開始落大雪，嘩，終於落喇，真開心！差唔多黃昏時，因有一為朋友扭親膝頭，所以佢架車先回程，我哋玩多幾轉先走。當我哋回程時突然收到信息，話佢哋架車喺上酒店條路最後幾百米因路面有冰太跣，上唔到山，叫我哋hold一hold！我哋於是揸到返酒店山腳等佢哋消息，冇耐佢哋話跟後嘅兩架車，都落車幫手推車，又好彩地，其中一架係酒店車，即刻幫手打電話到酒店求救。過咗一陣，就有架剷雪嘅拖車拖返架van上山。

另一架車，因司機曾經係賽車手，所以姑且一試，可惜，都發生咗啲小意外，車底輕微碰撞雪壆。至於我哋架車梗係淆底啦，決定泊响山腳，朋友call咗酒店車落嚟車我哋上去。幫手嘅各方人士都話吓，無雪軚，唔係卦.........

     

之後嗰日落咗成個禮拜都冇落過嘅雪，出門口已經到膝頭哥咁高，所以冇過山。由於落咗成廿cm雪，我哋諗，啲冰面應該覆蓋哂，不如拿拿林揸返兩架車落山，如果唔係最後嗰日唔知點走！同酒店商討過之後，佢哋肯幫手車返啲司機返上山，太好喇，起碼解決咗兩架車喺山上嘅煩惱。

第四日，我哋又決定過另一個山玩。酒店喺山上，於是我哋就滑落山，去停車場攞車。揸到上次條路時，因路面啲冰仲未溶哂，架車又上唔到！死啦，點算！商討完一輪，我哋揸返停車場，轉坐shuttle bus。攪一輪之後都順利玩咗一日！回程時由於我哋個場唔係第一站，而個個都係呢段時間回程，巴士嚟到時竟然上唔到車！慘！不過，朋友決定call的士返酒店，又俾我哋call到！其實真係不幸中之大幸，如果我哋上到巴士，到酒店山腳，我哋又要煩點返上山，所以，call的士直接返酒店就簡直係perfect！

最後一日，落雨！本來諗住過山，最後都係決定留返响自己山玩。

到最後回程返歸喇，同酒店傾咗一輪，佢哋最後都幫手揾司機七點半車我哋落山攞車，非常感謝！天氣晴朗，冰面都溶得七七八八，所以出highway條路非常暢順，感激。三架車又浩浩蕩蕩出發去成田。由於香港冠狀肺炎開始擴散，我哋諗住出中途站歇一歇腳，買啲口罩！唔算多，掃到少少啦！但其中一架車竟然miss咗個出口，佢哋自己揾咗另一個exit入油。又係上天嘅幫助，俾佢哋遇到間超大藥房！就係咁，佢哋幫忙掃咗幾十盒嘅口罩，每人都分到幾百個，太幸運啦！

雖然發生大大小小事故，但總括而言，我哋係幸運嘅！

1. 到達嗰晚，之前因無落雪幾日，路面光滑，如果唔係夜媽媽，幾十件行李上山就大件事
2. 過杉之原嗰日，如果第一架車唔先走，三架就一齊上唔到山，攬炒
3. 落勁大雪嗰日，啲雪幫我哋冚實哂啲冰面，兩架車先可以平平安安落山
4. 過池之平嗰日，回程時上唔到巴士，迫住call的士返酒店，反而仲理想，如果唔係落巴士都唔知點上返酒店
5. 由妙高出成田，如果另一架車冇miss個出口，又唔會誤打誤撞搵到間大藥房掃口罩

咁多啱啱遇着剛剛，令我哋呢個行程驚險得嚟所有事都迎刃而解！不過，亦因為咁，要知道好彩唔會永遠跟住你，所以亦上咗好寶貴嘅堂，下次租車去滑雪就會加倍小心！

涉谷型格酒店 Shibuya Stream Excel Hotel Tokyo

以往去東京，都會選新宿酒店留宿，因為貪方便，食買玩交通無一不便。今次朋友介紹住涉谷，仲要係新開冇耐，咁梗係要試試啦。Excel Hotel喺涉谷有兩間，千祈唔好搞錯。Shibuya Stream Excel Hotel Tokyo位置喺大概喺涉谷站東口，如果由大家熟悉嘅八公狗聚腳點，行八分鐘左右就到。涉谷站大工程都攪咗好多年，宜家可謂逐漸成形。酒店對面另一大型商廈亦於2020年完工，到時旺過旺角！

由成田機場乘坐Narita Express到涉谷站，記住要响涉谷新南口出，出站以後左轉行大概三分鐘就到達酒店，方便都不得了！全程一級樓梯都唔需要行，無敵！酒店有通往所有鐵路嘅電梯及扶手電梯，落大雨都唔係問題。

酒店最低三層係食肆，四樓lobby及餐廳，九至十三樓係房間，再上就係商業辦公室。每一層出𨋢都有一間房仔，有唔同嘅主題。例如九樓係mini gym，有兩架健身單車。十一樓係俾你熨衫嘅。

Lobby俾客人休息嘅area

Lobby層喺四樓，有幾間型格Bar同餐廳

每層都有不同的主題

好chic嘅房間設計，最鍾意佢開放式掛衫架

無多餘的設計，沖涼，廁所，洗面盆都係分開嘅

我住嘅樓層以Gym做主題

一至三樓都是食肆，包羅萬有。真心鍾意整座大廈嘅設計

有日式及西式餐廳，微型超市，甜品咖啡店，酒吧，各適其適

响酒店工作的「員工」，做完嘢自己返埋位叉電

廣島 四國

剛完成八日七夜廣島四國自駕遊，完全可以用樂而忘返四大字來形容。構思行程其實並不太難，皆因兩年前完成岡山，四國其中兩縣（香川，德島縣），淡路島之行。那次之後，發了誓要短時間內去完成廣島加另外兩縣（愛媛，高知縣）。所以腦內已經儲備了這次旅行想要到的地方。曾經掙扎過到底要不要落足摺岬（四國最南端），因駕車時間頗長，但做research時看到四万十川的風光，及於足摺岬看到星河，最後決定加插這個地方。

這個旅程確實有很多意想不到的驚喜，幸好，是喜多於驚。當然，也有點失望，例如山長水遠，經過無數髮夾灣上到四國的久万高原及千里迢迢走到足摺岬，就因颱風關係，遇上大風雨看不到壯麗的景色和最期望的星河。不過，總括而言，每一個到過的地方都令我印象深刻，值得推介給想遊廣島四國的朋友。

路線圖：廣島 - 宮島 - 松山 - 道後溫泉 - 下灘 - 大洲 - 內子町 - 四万十川 - 足摺岬 - 四万十町 -   今治 - 島波海道（大島，生口島，大久野島) - 尾道

網址: 廣島 四國

許廷鏗「再見智慧齒 Goodbye Kids 」

上星期六喺偶然機會之下到紅館欣賞許廷鏗「再見智慧齒 Goodbye Kids 」演唱會。真偶然，因為究竟幾時開show，幾時賣飛，都一直無留意。直到朋友問我有冇興趣嘅時候，並非 fans嘅我，因對Alfred嘅歌都頗熟悉，所以立即答應。本來抱住去睇一個偶像歌手concert嘅心態，當唱完第一首歌「我的志願」，嗰一刻，嗰種震撼，我知道我睇緊一個絕不簡單嘅演唱會！

開show前，睇唔到舞台設計，只用一幅落地大簾覆蓋住。熄燈後，大簾垂下，一個太空館般嘅鳥巢呈現眼前。Alfred著住醫生袍企正中央，被一大班都係著住醫生袍嘅choir圍住，差不多清唱唱出「我的志願」。耳朵真的懷孕了，雄厚嘅聲線絕對壓場。之後，除下醫生袍，再唱出多首首本名曲「殘忍」，「螞蟻」，「出走」，等。一個無敵嘅出場序，由許廷鏗牙醫畢業後，因醉心音樂，參加「巨星」，一步步行向自己嘅目標，終於行到今日，十年後開紅館演唱會。

概括是次演唱會，非筆墨形容嘅感動，每一part都俾到驚喜。同Alfred一樣，我最喜歡都真係同學會部份。知一定有嘉賓，同Mag合唱「忍」，巨星出身果然唔同，震撼澎湃！JW唱完第一句已經忍唔到喊，攪到我都有少少淚光。跟住嗰個，Alfred話「有個人佢保護我，多過保護佢自己; 佢錫我多過錫佢自己; 佢會將所有嘢都分享俾我！我開心，佢就會更加開心！我唔開心，佢會比我更加嬲！如果你都好似我咁遇到一個咁樣既人，請你好好地捉住佢，同埋記得大大聲咁講俾佢知，你喺我心目中係好緊要㗎」，全場大叫「欣宜」！嗰一刻我已經滴哂眼淚。好多時表演者介紹嘉賓，講對自己幾有重要，跟住一堆互戴高帽嘅對話，聽完都唔會有特別感覺。但一直都知道Alfred同Joyce嘅友誼真係佢哋形容嘅異父異母孖寶，分分鐘仲親過屋企人，嗰一刻根本唔需要任何客套說話，已經深深感受到。跟住四個同學仔大合唱「青春頌」，真正feel到佢哋嘅友誼並唔係夾硬做出嚟。再一個全場大合唱，呢一part相當圓滿！

睇得出許廷鏗好用心籌備呢個concert。應該冇乜人覺得佢係跳舞歌手，但竟然有一part係有舞蹈成份，雖然有些少部分跳得唔係好自然（尤其攬住dancer跳，哈！），但我覺得係加分嘅，起碼觀眾見到一個唔係淨係企响度唱慢歌嘅許廷鏗！

觀眾緣佢應該好高分！圍觀四周，由十歲小朋友，到六十歲嬸嬸都識唱哂佢啲歌，仲要爭握手位！好多時少男歌手，大部分fans都係女仔，但竟然俾我見到好多男fans，舉起智慧齒燈，跳住跟住一齊唱！呢個歌手，應該set咗個壞先例，就係fans叫影selfie永冇托手踭！第時其他歌手開演唱會就多得佢，哈！最勁係，咁多distraction，又唱又行又selfie，都保持靚聲水準，無甩咀，無走音，勁！

觀眾緣好，做乜都唔怕！唱阿樂時，諗住講對白記錯咗邊part入歌，攪到說話都未講完就即刻入，係小蝦碌，但，是可愛的！

除咗陳奕迅，我好少會有演唱會後遺症。但參加完Alfred嘅畢業禮，仍然意猶未盡，隔咗幾日都仲loop緊IG啲相同片段，已經化身做咗一個小小fans！

香港已經好少呢一種咁有份量嘅歌手，希望新公司可以助一臂之力，好好栽培Alfred，希望不久將來可以令佢更加發光發亮！

岡山。四國。淡路。

前言

多得「香港航空」新開香港至岡山航線，先有今次岡山，四國，淡路自駕遊嘅安排。八日七夜，本來想岡山，遊勻四國，廣島，再返岡山回程，做完research後發覺起碼要兩至三個禮拜，所以決定今次只去岡山加兩國香川懸，德島懸， 再加淡路島，行程已經非常豐富！下次行程就會飛廣島, 再加另外兩國愛媛懸同高知懸。

台北養生之旅

到台灣旅遊都不外乎勁飲勁食勁買，每次都會好好安排，好令行程「食得招積，玩得出色」。不過，大飲大食之餘，都一定會安排好幾個養生環節。所謂「天下沒有長生之藥、只有養生之道」，台灣人尤其深明呢個道理，所以周圍都係養生會館。

先介紹「健康洗」，Happy Hair 乃髮型養護專業連鎖店。全台灣有五十多間分店，隨一般洗剪吹染電髮之外，最愛就一定為「頭皮養護療程」。而我好幾次都係去位於台北永吉路分店。髮型師先用儀器檢驗頭皮，定出屬性，一照之下，原來我頭皮頗多角質死皮，有啲堵塞毛囊，本應一個健康毛囊會有三條頭髮，如果角質死皮嚴重，又唔好好護理，將來有機會頭髮越生越少，而唔健康嘅頭髮仲會比健康嘅特別顯得幼細。從來未檢驗頭皮嘅我，有點驚訝。

髮型師先用髮擦用力梳頭，跟住用適合我頭皮性質嘅精油幫我按摩差不多二十分鐘。然後就開始「健康洗」，即係瞓喺洗髮椅，一邊洗，一邊再按摩，我真的睡著了！經過差不多一個鐘嘅按摩，真心覺得頭皮乾淨清爽！

髮型師Jessica非常專業細心，我哋一行五人除咗我剪頭髮以外，每一個都係長髮姑娘，而Jessica就用心地為每一個造型，離開時已經可以去派對！

陳奕迅神級表現第26屆台灣金曲獎

Facebook上朋友們紛紛post上Eason於六月二十七號晚第二十六屆台灣金曲獎上solo九分幾鐘嘅《八號風球》組曲，為Eason迷嘅我又點可以蝕底，快速上網搜尋，而當晚youtube已經有足本片段上載。由於係第二十六屆，Eason用八分多鐘，由十八人管弦樂隊伴奏唱出香港九十年代歌星嘅國語作品，首首都有代表性（我覺得一半一半啦），一晚我已經聽咗十幾次喇！

打頭陣Eason清唱自己嘅婚禮的祝福，由慢板開始，中段有jazz，快板，最後都係自己歌謝謝儂作結尾，好一個首尾呼應，簡直perfect！

志賀高原

今季滑雪之旅決定離棄去咗十多年嘅Niseko，試試離東京數小時，位於長野嘅志賀高原。住宿地點為燒額山底嘅Prince Hotel西館。出發前做research已經知道附近無啖好食，對於被Niseko縱慣嘅我哋，有啲擔心，本來想轉場，但已經太last minute，唯有如期出發。
Link: http://sta-shigakogen.blogspot.hk

Airbnb之初體驗

剛由志賀高原滑雪歸來，原本打算滑足八日八夜，但體內購物基因太澎湃，所以決定提早一日返東京走走。由於實在太last minute，亦因為二月廿三乃東京馬拉松，酒店都爆得所餘無幾。於是膽粗粗試試Airbnb。

Airbnb app頗容易使用，設定日期，人數，地區，要房間或全個apartment，一按之後所有available嘅地方就全顯示出嚟。

我選擇咗離東京Metro北參道站步行三分鐘嘅Okura Residence Kitasando，其實選嘅時候無特別留意距離，主要相片合眼緣，就決定預訂。

Airbnb網站會發email通知訂房成功，發送收條。雖然Airbnb乃美國網站，但收費單位為歐羅。價錢包括apartment兩晚租金€315，清潔費€35，服務費€45，總數€395。由於近期Euro跌價，港幣折實大概＄3600，每人為＄888，真超值！清潔及行政費應該屬於「硬掘」，按原價多加25％。

Host of Japan 乃主理人，其中Mariko跟我都以email溝通。日本人真細心，email告知路線圖，圖文並茂，一定唔會走失。最初有想像過提取鎖匙問題，原來該apartment mailbox有如開夾萬，左擰擰，右擰擰，鎖匙就放裡面。

講真，今次因為又有行李，又有board bag，確實有點論盡，好彩北參道站沿途都有扶手電梯，方便到極。附近有二十四小時7 11，半夜食指動都無問題！ 到達apartment大門，發覺周邊非常寧靜，安全，而建築物非常modern，用料靚極。提取鎖匙後，直上二樓房間。打開後發覺近照片絕無差異。朋友乃室內設計師，對房間用料設計非常欣賞。室內應有盡有，可聘美酒店，只係無毛巾牙擦供應。

對於今次初體驗，我真係非常滿意。遊東京呢個大城市，確實只需要一個乾淨地方梳洗及休息，因為逗留室內時間唔多，租住呢類apartment已經達到基本目的。

Nail Arts - Water Marble

某日喺Instagram胡亂地browse，見到一個account名叫nailsartvidss，裡面全部都係nail arts嘅videos。見到一啲videos好特別，叫water marble，係教點樣做花睇落好容易咁，於是自己又試試。不過，做落其實唔容易，有好多tricks，例如滴點唔可以太高，甲油有機會會跌落杯底。又或者甲油與甲油唔混得埋，就唔會化開，真係要試多幾次先成功。睇咗好幾個youtube videos，以下呢個，屬於Meliney嘅video確實教得唔錯，佢又會教啲tips，大家可以試試。

女人四十

不經不覺已進入人生第四十個年頭，對於舊一輩人，四十歲已經人到中年，好多事都已經慢落嚟，預備進入老人家嘅心態。尤其女性，四十歲，最好隻字不提。對我而言，四十歲，反而有另一體會。

過往十多年，發生過嘅人與事，你話我幸運又好，身邊多貴人也好，都係開心居多。不過，都令我體會到，人，一定要活在當下，你可以話老套，係人都知嘅道理，但要實行嘅話，又有幾多人真係做得到？ 無數人因為某某小事，腎上腺上升，大吵大鬧，諸多不滿及投訴，終日納悶中度過。雖然過咗短短一星期，但發覺四十歲嘅我，無咗火，認為所有事情都有解決嘅方法，對於人，尤其最親嘅人，以往都比較偏激，好似對阿力，如果佢叫我唔好咁咁咁，應該咁咁咁，以前嘅我，就一定自尊行先，俾返說話佢聽，點解我要咁咁咁！不過，火氣減滅以後，寧願應一聲「哦」，都唔會諗點去反擊。

做人如是，工作也如是。剛去誠品，買咗一本女性與工作嘅心靈雞湯書籍，發覺我呢種心態，用於工作上，亦大派用場。「冇嘢係解決唔到嘅」，職場上太多複雜嘅人與事，往往放自己利益在先，而忽略咗big picture，以至錯過好多好風景，幾咁傷神！雖然書睇到一半，但體會良多，發覺自己其實幾幼稚，幾唔成熟。我亦希望可以介紹一下因工作無咗自己嘅朋友，內容一針見血，可能覺得每句說話都好似衝著我而來，非常深刻！

窩心的台灣文化

可能因為台灣曾經被日本統治過，好多文化都被薰陶，例如點舖裝潢，detail oriented，而最值得我敬佩就一定為細心。

話說早前台北行，到一拉麵店食lunch，旁邊有一孕婦，店員立即將一小攬枕放到孕婦背部，喺香港從未見過有此待遇。

食拉麵途中，望見有一張小溫馨提示放喺一旁：如有需要，可向店員拿紙圍巾或髮圈。冇諗過細心如此，真值得加許！

牛油果醬

這款牛油果醬非常容易做，最適合招呼朋友作頭盤之用。

材料：牛油果2個，番茄2個，青檸2個，洋蔥半個，辣椒半個，粟米片1包，橄欖油2 tbsp，青鹽少許

1）將牛油果去皮，並於沙律盤內弄碎，不要拿走果實，可以令腐壞速度減慢，待用
2）青辣椒, 洋蔥和番茄去芯切粒
3）將青辣椒和番茄放入牛油果攪拌，混入青檸汁，加入其他調味料，上碟

骨盆操

近期醉心於研究骨盆操，原因為返工以後長期處於靜態坐姿，久而久之腰跟臀部都會隱隱作痛，就算多做拉筋動作都無補於事。好耐以前寫過關於骨盆操嘅blog，而今日再介紹呢款超強（well，剛剛處於起步階段，超強與否，當真work or not，要時間見證）人氣骨盆運動，希望加強改善骨盆問題。

日本人果真創意十足，創造骨盆枕，不過，唔一定要買，可以自家製造。將一幅床單卷起成圓柱體， 好似圖片一樣，身體放鬆瞓低，將個枕墊喺腰下（有啲blog話最好放喺背部肋骨最低一節以下），用個綁頭髮嘅髮圈綁住雙手拇指拉直放喺頭頂，兩腳母趾黐住成八字，維持5分鐘。親身試第一次，果真唔容易。因腰部好多時都攣起，一但拉直，真係幾痛，第一次無可能維持到5分鐘。做完千祈唔好即刻坐起，最好身體慢慢打側再起身，就唔會咁容易整親。

啊，加多句，姊妹，千祈唔好翹腳坐呀，好易令骨盆移位㗎！

推薦台北丹迪旅店大安店

六月中到台北四日三夜，一早於網上揾旅店睇中丹迪，覺得好乾淨舒服。有台灣朋友幫手，港幣八百一晚，仲有園景，好期待。我哋揀咗大安店因為活動範圍都係喺大安區，貪方便。

旅店外觀唔算太標緻，頗普通。入到大堂，感覺舒服，已有好感。房間今次係506，就係對住大安森林公園。房間精緻，最重要係好乾淨，好整齊。通常最重要係睇洗手間，都冇發現污跡，非常好！

有幾點要讚一讚丹迪：

• 窩心嘅服務：今次台北行係慶祝生日，當晚返旅店後，發覺桌面放咗碟waffle，並有一張greeting card！
• 體貼：每朝起身都過咗早餐時間，但lobby就放咗部咖啡機，免費提供咖啡同熱飲
• 非常方便：大安丹迪最近嘅捷運站係大安森林公園站，離旅店只不過係二十步，非常方便！  

相信我下次再到台都會選擇大安丹迪，不愧為Tripadvisor旅客選為最佳旅店！

跟着鄭多燕跳跳跳

朋友介紹網上流行已久嘅鄭多燕Figurerobics健康舞，一個韓藉四十七歲嘅「阿豬媽」，憑自創嘅一套健康舞，由一個肥師奶，遙身一變，變成一個又靚又fit嘅索女！個個都話work，於是就喺ipad放住佢嘅youtube video，嘗試跳跳跳！

雖然動作唔快，但多燕姐帶住一班fit爆嘅男女，笑住咁one，two，three。三十幾分鐘嘅video，跳到廿幾分鐘已經汗流浹背，一邊抹汗，一邊繼續one，two，three，好鬼high！跳完覺得自己好似輕咗好幾磅！會繼續搵佢嘅video再再努力！

曹格 Project Sensational Sound Concert 香港演唱會2012

曹格officially香港第三次演唱會，以往兩次都喺Asia Expo，今次終於可以喺紅館開！原本以為只開一場，後來話「反應熱烈」要加場。十一人浩浩蕩蕩踩入紅館，由於有前bma artist幫忙之下，位置不錯！眼看入場觀眾都差不多，但中段位置頗冷清，心想分兩場豈不分薄氣勢，有點莫名其妙！聽說今次concert以jazz為主，可能未必完全迎合香港大路演唱會路線，所以影響銷情。不論如何，還非常期待Gary於紅館第一次！

要讚一讚Gary那對band！由band以勁jazz演奏開幕，非常吸引，每一個都背景非凡，屬於行內精英。Gary嘅演唱簡直用「很難在雞蛋裡挑骨頭」嚟形容，從無擔心會發台瘟，走音之類情況，反而計算唔到自己雞皮會起幾多！Gary穩定表演令全場歡呼不絕，ad lip玩得無懈可擊！第一隊嘉賓出場，旺福，台灣樂團，老實話，我唔太懂欣賞！先跟Gary合唱「甜蜜密」，勁走音。第二，三首，有如兒歌，十幾分鐘絕對係觀眾所謂「廁所位」！

下位出場乃馬來西亞同鄉兼師妹Gin Lee！一向欣賞Gin嘅唱功，還記得第一次接觸Gin嘅聲音係於「超級巨星」踢館，一首「多得他」非常厲害！到今時今日簽bma再於香港推出個人專輯，都對佢有期望。先跟Gary合場「羅密毆與茱麗葉」，好合拍。再solo一首重新arrange嘅「If I aint got you」，海豚音震撼全場，不得了！加油，Gin！

Gary跟住介紹伯樂Michael Tu涂惠元，鋼琴帶住曹格唱出兩首經典作品「剪愛」同「聽海」，全場耳油溜走！再出一個李泉，當年非常喜愛主打歌「走鋼索的人」jazz出味道！還不特止，Michael加李泉再來一個無敵duet，暈了！

最後一個超級特別嘉賓，黃大煒！呢一代應該無人不曉，就算不曉，那一定聽過「你把我灌醉」吧！頭髮少咗，發少少福，但那股味道從無減少，魅力依然，全人類再次暈倒！

不得不提一位現場嘉賓，好少聽到呢位人兄會身為觀眾現身演唱會！開場前有陣騷亂，叫囂聲不絕，回望控制台，天王劉華剛入座，有型士身穿黑色西裝加牛仔褲，令歡呼加閃光燈不停！後來Gary更特別歡迎華仔到場支持！

八千觀眾，雖然未擠滿紅館，有點唏噓。但在場歡呼叫喊聲絕不比全場爆滿為少！但但但最失落反而無人叫encore，何解？！至少我喜愛嘅「刮目相看」不知跌往何處！雖然如此，但我還期待曹格下一次香港嘅concert！

清新發現 Jayesslee

有日喺youtube無無聊聊搜尋，無意間睇到兩個女仔自彈自唱嘅video。天使嘅聲音，自然又自信嘅表現，加上樣子甜美，吸引起我嘅注意力，再搵多啲關於佢哋嘅資料。

呢一對喺澳洲土生土長嘅韓裔twins，自2008年貪得意放段自彈自唱嘅video喺youtube，估唔到點擊次數奇高，有好幾百萬人睇過，開始為人注意。Janice同Sonia呢對twins，好可愛，表情多多，但唔造作，令人喜愛。Youtube已有幾十個video，再加上佢哋放咗好多生活點滴嘅片段，都令人覺得賞心悅目。多咗人留意，佢哋重開始世界各地去演唱，今年仲做咗個Asia Tour，可惜冇香港！

以下係一係列Jayesslee嘅video裡面我最鍾意嘅。呀，唔記得講，jayesslee名字嘅意思就係用咗Janice同Sonia名字嘅開頭拼咗個讀音出嚟。








More about JS


2012年，細孖Sonia結婚了！The lucky man就係video背後嘅男人，亦係JS嘅經理人，出show時嘅drum man Andy！呢個video就係Sonia同Andy結婚嘅花絮，好sweet！



而結婚後兩夫妻仲開咗個account叫AndymetSonia，專放婚後嘅生活片段，好cute！

我愛薀莎

啱啱做完兩part鐘massage，真係舒服哂！幫襯咗薀莎都好一段日子，按摩呢件事好睇運數，搵到個好嘅按摩師，真係要好好keep住。我最愛嘅按摩師身材驕小，但非常到家！對女士嚟講，力度其次，最重要係按啱位，尤其啲筋與筋之間嘅位，唔係個個都可以揣摩到！由於經常運動，身體好多地方都酸軟，但次次唔同位置，哈，但姐姐又好似知道我邊度出事，永遠攪到我死去活來！雖然薀莎收費唔算好平，但搵到個適合嘅按摩師，每次乜都唔駛講就知我要乜，又有乜所謂呢！

阿笨與阿占做體操

以前睇過唔少「阿笨與阿占」（パン＆ジェームズ）嘅搞笑video，呢個都令我捧腹大笑，每次睇，每次都笑死！

天王的另一半

今日睇到報導，劉德華太太朱麗倩生咗baby，真係可喜可賀。呢件事令我諗起各天王嘅另一半。劉華呢個老婆冇乜嘢，係真係乜嘢都冇，未聽過佢把聲，未見過佢正面。所有相都係低頭，側面，幪面，甚至係經常黑面，好似劉華以外，佢同其他人有眼神接觸會褻瀆神明咁，好特別。劉華當然好配合，每次都擋駕，拖喺身後，似捉住個犯多啲！其實低調嘅話可以少說話，多微笑。冇人要你回應記者，對住鏡頭笑吓，親民啲，唔好咩？擺到明你一對係公眾人物，做乜都會引人注意，咪歡容啲囉。







學友嘅羅美薇又係，結咗婚開始收埋收埋，從無俾人影到一家人嘅照片，真係懷疑佢哋有冇一家四口出過街，哈！May May自變為張太後，每次影到佢又係黑口黑面，都係想低調啫，都係嗰句，身為公眾人物，歡容吓啦！而俾人偷影喺馬會club house做gym，都要用燒捍太陽帽遮到實一實，顧住侷親呀！










城城嘅熊黛琳，真戥佢唔抵，佢擺到明好想被承認，但偏偏俾阿王收到實一實，又唔認拍拖，阿Lynn收到禮物想透露吓，分享吓，又鬧，攪到成日扁哂咀。

都係黎天王個樂基兒最大方，永遠笑面迎人，對答得體，應講則講，唔會亂加評語。咁咪好囉，只會有正面嘅報導，最多俾人追問幾時生baby啫！

你認同嗎？

有日睇微博，見到一金句：如果與情人分手後，仍可與對方做朋友，那你跟他的愛不算很深。但分手後在大家的世界永遠消失的話，那大家都曾經非常深愛對方。諗一諗，唔知道理何在，但確實正確。可能唔想在喺對方嘅世界再有乜漣漪，或會勾起一啲過去吧！

泰拳班 II

上次提及泰拳班係好幾個月前，數數手指，都打咗七個月。對呢個運動，只可以講越嚟越愛！由一個禮拜打兩至三日，到現今去四至五日，仲每星期上多堂私人課，越打越起勁！泰拳，除咗好老土咁話強身健體之外，對我嚟講，真係幫助我解決本身積存嘅身體問題。以往都有做運動嘅我，流汗只限於啱啱做完運動，其餘時間想搵滴汗都無！就算三十幾度行街，都只係覺得熱，未至於汗流浹背！但係，上星期喺屋企，飲完碗熱湯，竟然大汗夾細汗，自己都覺得，神奇！
私人課，一向都覺得自己未夠份量去嘗試，我班中鐵腳因較早前要開concert，所以一個人上咗十幾堂，佢覺得我絕對可以嘗試。於是，兩星期前，仲捉埋我一齊上！不得了，絕對係力同鬥志嘅表現。由於教練出名係「魔鬼教官」，一小時嘅課程一啲都唔可以hea！就算幾辛苦，幾想休息，未踢完，未打完，絕對唔可以行開！呢啲意志力係自己做gym無辦法做到。明明覺得已經去到limit，教練話左右腳踢多二十下，個小宇宙唔知喺邊度爆發出嚟，原來係可以再繼續落去！呢個滿足感真係非筆墨可形容。warm up，對打，沙包，攞命sit up，時間過得好快！最開心係教練話我哋好夠氣同尚算力度大，佢最鍾意打到啪啪聲喎！不過，對我嚟講，搵到樣自己鍾意，又會持之以恆嘅運動就最滿足！


呢個星期「拳王」剛播出，肯定會帶嚟一股泰拳熱，希望想學嘅人唔好抱住「好型」所以學嘅心態，因為唔放心機落去，型唔可以型好耐！

良心車仔麵 -「鍾記粉麵」

以往食開車仔麵，好自然淨係識去新記，因為喺銅鑼灣旺區嘅車仔麵店唔多。不過自從幾年前佢哋將啲食材縮水，變相加價之後，我就少咗去。有晚十一點鐘，掛住天后華姐嘅清湯腩，點知已關門大吉，行行吓見到有間車仔麵，於是就去試試。

呢間「鍾記粉麵」細細間，幾張枱加一排bar枱位，總算乾淨。點餸紙上都有一啲其他少有嘅食物例如魚腐，獅子狗等。碗車仔麵嚟到真係好開心，有番初戀嘅感覺。原因係，而家啲車仔麵嘅餸太太太的骰，貢丸魚蛋好似麥提莎咁丁粒，牛肚一開三當三片，確實令人氣憤！「鍾記」呢啲就真係有良心，所有餸都大大件，起碼俾番原本嘅size。味道亦唔差，當然，食完好口乾，皆因味精太重，無計！但＄32五個餸，送生菜，仲想點呢！

最愛Felix The Cat

都唔記得細個仔幾時開始鍾意Felix。淨係知道我收藏佢嘅物品超過二十多年！由當年Sanrio有賣佢嘅精品，到購只外國網站，又曾試過喺ebay bid啲1920s德文嘅書籍。

宜家粗略估計都應該有超過200件收藏品！激點可直接進入album。

當中，當然有啲係打死都唔賣嘅心頭好啦！例如個頭盔，當年購至札幌一百貨店，要四千幾yen，其實因為yen今時今日咁高，個頭盔個價都double咗！

仲有搞鬼car plate，如果可以用我都想放喺架車度，唔知香港俾唔俾呢？

呢個係印有我個名嘅felix stamp，講真，完全唔記得喺邊度tailor made呢樣東東！

愛煞亦舒

愛煞亦舒那一針見血的文字。今日於微博上，亦舒寫「無論做得怎樣天花龍鳳，西菜都不好吃。各人自叫一盤菜，不是一塊雞就是一塊肉，整晚就是那道菜，叫錯了也得慢慢嚥下去，有點像婚姻，不是你自己挑的嗎？」抵死吧！

還有還有，「他以為我天性磊落。不不不不不。每一個女人，在她心愛的男人面前，都是最嬌媚最柔弱的。我不愛他，所以冷靜鎮定，若無其事。」拍案叫絕！

不愧為我兒時偶像，寧願拿著你的「忽爾今夏」也不多願看參考書本。