愛煞亦舒

愛煞亦舒那一針見血的文字。今日於微博上，亦舒寫「無論做得怎樣天花龍鳳，西菜都不好吃。各人自叫一盤菜，不是一塊雞就是一塊肉，整晚就是那道菜，叫錯了也得慢慢嚥下去，有點像婚姻，不是你自己挑的嗎？」抵死吧！

還有還有，「他以為我天性磊落。不不不不不。每一個女人，在她心愛的男人面前，都是最嬌媚最柔弱的。我不愛他，所以冷靜鎮定，若無其事。」拍案叫絕！

不愧為我兒時偶像，寧願拿著你的「忽爾今夏」也不多願看參考書本。

GEM 澳門演唱會 2011

世事就係咁奇妙，有時想做未必有得做，有時又會無孤孤有surprise。我講緊睇GEM嘅concert。佢五月喺香港嘅concert冇睇到，但聽口碑不俗，而知佢會有part 2時都諗過買飛，咪就係得個諗字囉，又冇付諸實行。上個weekend我哋同許氏夫婦day trip遊澳門，食完lunch，諗住喺casino渡過餘下時光。下晝六點幾，突然許太call話有GEM嘅concert喺Venetian，問有冇興趣，吓，咁突然？！不過諗咪浪費咗啲飛，於是八時恭候金光綜藝館。

由於GEM香港嘅concert我連DVD都無睇過，所以完全唔知內容或舖排，都有所期待。果然無令我失望之餘仲覺得拍案叫絕！這小女孩確實勤力，完全冇悶場，俾哂100分努力落個concert度。無論舞台，視覺效果，dancers嘅功力，GEM嘅唱功同才華表現（當然係琴技），表演嘉賓Metro（A cappella Medley），都令我歎為觀止！雖然最大賣點pole dancing有啲流流地，哈！不過佢小巨肺嘅表演，有好幾個位都確實令我起雞皮！

泰拳班

剛離開工作咗八年零一百六十一日嘅地方，身邊好多人都話羨慕，叫我好好休息吓，扮吓少奶奶。雖然我自己都係咁諗，但硬係覺得太無所事事都係唔得。最開始嘅時候有啲唔慣，唔習慣於咁多年間每日穿梭於屋企同公司，日日呻住幾忙幾忙，但一刻呢個習慣一旦消失，都真係有少少失落。

不過，就喺呢個時候，俾我搵到個健康嘅嗜好。喺朋友嘅介紹下，我開始咗上泰拳班。Swish Club位於銅鑼灣，非常方便。初初上嘅時候，由於我嘅姿勢停留於Kick Boxing年代，要改一改，都有啲困難。

上咗都有一個月喇，發覺有明顯嘅進步，包括心肺功能好咗，持久力耐咗，以前放工返屋企每次行嗰條斜路好似攞我條命咁，支氣管仲會痛；不過宜家再冇問題喇！sit up同push up 明顯做得容易咗。當然，我最關心嘅都係減肥嘅問題啦！雖然冇超快速度減磅，但腰嘅線條好明顯改善咗，如果能夠加埋食物配合，咁就快手喇。不過，我好鍾意食嘢，尤其麵包同甜品，簡直係減肥大敵。唯有唔出街嘅時候，食多啲燕麥代餐啦！

蕭敬騰的香港第一次

第一次真正睇蕭敬騰嘅Live演出，係喺四月墾丁嘅春浪。還記得當時嘅激動，震撼，所以對佢喺香港嘅第一個concert特別有期望。好難先撲到飛，雖然位置並唔係最好，但還是覺得會好high！先嚟首「狂想曲」開場，唔錯，之後嘅歌同rundown就真係好turn down。香港嘅第一炮，點都要平地一聲雷。我諗隊crew唔係好知香港人要啲乜。

歌揀得唔好。冇主題。講嘢環節九唔搭八。連香港人認識Jam嘅星光大道都冇提及。出過四隻碟，但focus唱哂新碟。佢啲英文字咬得唔好，但偏偏揀咗好多英文歌。唔夠首本名曲唔緊要，但唔好揀啲怪歌，Justin Bieber！？蘇芮？唔識跳舞，學草蜢跳忘情森巴舞？如果好似學友咁擺明有一段係舊歌，有個theme仲好啲。冇人編撰佢講嘅嘢咩？全部冇substance。除咗新碟唱咗四五隻新歌，其餘嘅舊歌得「原諒我」同「新不了情」，＄480張飛，兩首歌各值＄200。

都有啲笑位。愛情陷阱 -- 像是混亂又像特別為了「紫米露」。仲唱唱吓玩埋周。哈哈。

就算encore部分唱「新不了情」再加「王妃」，都補唔番。都幾失望。

爺爺

親愛的彭爺爺已經離我們而去。雖然生前沒跟爺爺有太多的說話，但每次見他，他總笑容滿面，愛跟嫲嫲親暱的鬥咀。聽阿力說爺爺的往事，都說他愛煞嫲嫲，是一個大好人。倆老共處六十多年，都這麼一個年紀，仍恩愛地手挽手，令人羨慕。

爺爺由生病開始，從沒抱怨，嫲嫲及姑姑從沒鬆懈地細心照顧著他，儘管嫲嫲有多累，有多辛苦，都無怨無悔的照顧著爺爺。雖沒有參與照顧的份兒，但每次見嫲嫲，都會找機會安慰她。

當日收到阿力的短訊，說爸爸已跟醫院簽發了同意書，如爺爺情況轉壞，也不會再加以醫治，望速到醫院見爺爺最後一面。心裡很酸。雖知這日總會降臨，但它真的降臨了，還是有點不知所措。到了醫院，眾人陸續到達，最慶幸爺爺眾兄弟姊妹裡都有代表在場，也感安慰。各人心情還是平靜的，有時還有說有笑。第一次進病房看爺爺，見他閉著眼，每一口氣也很用力地呼吸著，好不辛苦。

再見爺爺的時候，已是醫護人員召喚我們，說爺爺的情況轉壞，各人應陪伴身旁。沒有想到事情會這麼快轉差，只希望他不用這麼辛苦。爺爺已沒有急速的呼吸，眼睛還是閉著，微弱地呼吸著。醫生叫我們不要離開，守護著他。各人情緒開始不穩定，有的開始飲泣，氣氛陰霾。尤其嫲嫲，她已站不穩腳，要姑姑扶着，不停摸著爺爺的臉，不相信爺爺即將離自己而去。我心裡只顧不停的念著經，希望天主好好的照顧爺爺。慢慢地，儀器上的數字續漸下降，沒有掙扎，爺爺就這樣漸漸地沒有氣息，慢慢地離開。各人看著他，知道這是一個不爭的事實，深呼吸一下，續漸走出病房。

他帶給後人許多的回憶，都是開心的。他是我們的榜樣，沒有驚世的偉績，但他痛錫家人已足以令我們好好學習。老套說句，一切得來不易，所以真的要及時行樂，珍惜身邊的一切人與事。爺爺，慢慢走，我們會好好生活下去。

日本骨盤操，好work！

由於經常坐骨同大腿筋酸軟嘅原故，都睇咗好多做乜運動可以舒緩痛楚嘅方法。無意間睇到呢個youtube片，覺得好似好易做又好似好make sense咁，就開始跟住做。

將冷氣熄咗，舖咗張瑜伽mat跟住做，做幾吓，嘩，真係出汗㗎喎！主要出汗位係大腿側同後面。喺休息嘅兩分鐘我就進行肚皮刮痧，做完嘅感覺即刻係消咗啲水腫，仲有即刻有倦意。雖然我唔係有失眠嘅人，平時都好快瞓得着，但個分別就係第二朝起身，懶床情況改善咗，精神咗，星期六仲九點鐘自然醒，咁證明睡眠素質好咗有關！不過言之過早，都係做咗三日，希望我持之以恆，喺不久之後再report時有更好嘅狀況！

不可思議星期四 ~ 好多中國人「盲搶鹽」呀！

一句講哂，離哂譜，period。

可憐的狗狗

妹妹跟男友喺網上睇到有西摩bb出售，話呢胎有五隻咁多，價錢都係千幾蚊一隻，心郁郁，於是決定叫埋我地去幫手睇吓。聯絡者本應約十點見面，但最後遲四十五分鐘先出現，眼見一對年輕人，「身世」可以，家住東頭村。心想，應該沒問題。往他們家途中，他們說如果看中，就要立即帶走，問清楚後才知小狗才一個半月，還需要媽媽人奶嘅營養，要咁趕嗎？


門打開，有一股惡臭味蜂擁而出，未見到狗狗，先見到一個中年男人，坐住張凳仔，對於個電腦，喺咁易拎轉背打個招呼。再見一隻貓貓出嚟迎接我哋，另一隻踎係櫃頂，再拎轉背，家裡面仲養咗隻蜥蝪，牆紙破爛，門都喺爛嘅。喺狹小嘅屋裡面，加埋啲味道，已經好唔想留多一秒！狗狗呢？踏入多幾步，見到個小籠，裡面有隻bb狗，令外四隻加媽媽就鎖喺另一個大啲嘅籠裡面，心裡已經好難過。兩男女開鎖放狗媽媽出嚟，身型非常瘦小，被欄開嘅小朋友係因為俾其他小兄弟姊妹欺負，所以要隔開。最離譜係，底盤係有尿尿，但冇人理會，唔好話放片片，連放張報紙吸吓尿都冇。


睇見媽媽走到我面前擺尾，但見唔到Bon Dau嘅天真笑容，反而感覺佢好似話，快啲帶我走。而小朋友呢，個幾月，一啲都唔活潑好動，個個愁眉苦面，回想起Bon Dau同一年紀，個個精靈可愛，吱喳不停。大籠個底都有啲尿尿滲出嚟，見者都真係傷心！


咁嘅環境，連抱都唔咁抱小狗，我極其量都係輕摸媽媽頭頂。喺啲咁嘅地方居住，乜真係覺得冇問題嗎？佢哋有冇諗身為探訪嘅人，心裡點諗呢？莫非覺得冇問題？於是我哋逗留咗幾分鐘就離開。根本所有硬件軟件都錯哂，可憐幾隻小狗狗，真係想搵方法將佢哋拯救出嚟。我哋帶住失望又心酸嘅心情離開一個我覺得係兇案現場嘅地方。

《潛行深淵》有憂閉恐懼症者，三思

同幾個友好一齊睇呢套戲，諗住都係一般驚慄片，入戲院嚇吓自己。電影講述潛水專家 Frank率領探險隊深入巴布亞新畿內亞嘅不毛之地，正當隊員潛入地底水洞嘅時候，竟遇著傾盆大雨，沙石雨水滾滾落下仲封死了唯一嘅出口。要自救，就要利用手上僅有嘅器材，潛入錯綜複雜嘅水底迷宮，找出連接大海嘅秘道！

可能自己本身係屬於有憂閉恐懼症，好怕身處於狹窄嘅空間，會呼吸困難。一路睇，一路不停深呼吸，感覺好唔舒服，好似置身其中一樣。喺戲院出嚟之後仍然感覺不爽，要靜下一輪之後先回到魂。所以，如果你有同一個恐懼症，都真係要諗吓先睇。

《撳錢》

澤偕仔NOW公司一班有腦之人果然有料到。好一個互動遊戲節目，令香港人又再掀起一個電視遊戲熱。最成功嘅原因莫過於唔駛經過登記，抽籤，選拔，面試，上鏡，被評頭品足，同人拼過你死我活，只要坐喺屋企他他條條揸住遙控，撳個制就玩得，遊戲公平公正公開, 果真合哂香港人又可以懶，又有著數嘅心態。

自己都玩過，第一次喺朋友屋企，六個人，四部電腦，兩部iphone，雖然第二條已經被KO，但咁多人齊心做一件事嘅精神，真係好耐冇試過。遊戲好似當年嘅'Who Wants To Be A Millionaire'，不過會tricky啲。而節目嘅目的都係等參賽者利用網絡搜尋器或者諮詢家人朋友，又或者一大班人利用某些策略去參找答案，非常益智嘅出發點！講真，冇啲策略真係唔容易。就算有四十五秒時限去尋找答案，都未必會俾你咁容易search到。加上有可能網上大塞車，都咪話呢十萬蚊好易中！

但玩過好幾集，我都係唔太適合一啲俾時間操控嘅遊戲，我會身痕㗎，信不信由你。

單拖情人節

阿力嘅公司都冇解嘅，捉哂啲人喺情人節去澳門開會！雖然阿力尋晚陪我返香港過十二點啫，但真係好多年冇試過一個人情人節，哈，其實呢個節日都已經唔係咁花心思慶祝喇，今年連禮物大家都冇預備，只係大家一齊過十二點，講聲Happy Valentine咁就係喇。

今朝就主要喺淘寶shopping，今次買咗對壓力襪，420D喎，睇吓有幾勁！仲有百幾蚊人仔買咗對boot，幾cool㗎。最後＄1.8一個價錢買咗透明鞋盒50個，同阿岑太share。今晚都係返屋企睇電視，淡淡咁過，都係一個relax嘅晚上。

天籟之音 陳潔儀

真係以為陳潔儀已經不再眷戀樂壇，暗暗淡出。早幾年嘅事喇。但近日無意中喺網站發現佢出咗隻新碟，係唱其他人嘅金曲，好似「追／今生今世」，「你把我灌醉」，「兄妹」等十首，重新編曲，重新演譯。我自己覺得有啲好過原唱，有啲原唱比較好，有啲一樣咁好，不過唔同風味。不過唔係好鍾意個封面，披頭散髮黑白照，好似好陰深咁！

第一首聽嘅係「追／今生今世」，又係聽完會流眼淚嘅作品。Kit啲清唱或好少音樂做背景嘅歌，已經唔係第一次聽到流眼淚，最記得睇雪狼湖時佢清唱首「原來只要共你活一天」喺現場嘅震撼，好感動，眼淚自然咁流落嚟。

聲音依然清脆，希望Kit可以繼續唱歌，再出屬於自己嘅大碟。其實有日坐車經過見到Kit喺DBS廣告牌上，係關於理財嘅廣告，唔知係咪想漸漸淡入返樂壇呢？

風雲色變

尋晚睇電視，聽到句說話：好多人生活喺習慣裡面，但一旦要改變，要真係改變原有嘅生活方式定係找尋另一個習慣。有啲深奧，但又係真，不變唔係懶，係怕去改變，再去適應另一個環境，習慣。
2011年將會有所改變，未知路係點樣走，就算安於原位，都一定會改變，或者好，或者我會唔習慣，又或者我都會選擇離開原位。八年，真係唔係一個短時間，中間建立嘅culture，做事嘅方式，周圍嘅人物關係，所有都係掌握之中，究竟我應該繼續擁有掌握嘅嘢，但合作嘅人唔同咗呀，定跟番合作開嘅人，不過其他事與物都再從新適應過呢？
都係未知之數。

Uncle James，安息吧！

“God has called this man home to heaven. Passed through glory’s morning gate and walked in paradise. In loving remembrance of Uncle James.”

世事無常，今日唔知聽日事。四姨丈James喺今個月較早前已離開咗我哋。感覺仍然唔係好真實。回想佢哋一家喺十一月份趕住返加拿大居住，可能身心皆累，病就係咁發出嚟。由發病到離開，只不過短短一個月多時間，幾唏噓。

同四姨丈唔算好close，但小時經常到佢哋屋企作客，馮氏每個weekend都喺康怡梁宅打蹬，嬉哈一整晚後依依不捨返歸，童年家庭樂好富裕。記憶裡面四姨丈幾惡，仲記得「黎明」事件，表妹某一年用＄25買咗本偶像黎明封面嘅雜誌，已經收埋喺床下底，最後精明嘅四姨丈搵到本雜誌，撕爛佢，屍駭連港幣25元放喺表妹嘅書枱處，好不有型！加上無數嘅撞爛門事件，網球單打或雙打球賽，令我哋每次去佢屋企都有戲睇。

不論今次令病情加惡嘅原因係乜，都已經係一件事實，喺香港嘅我哋除咗安慰，就只可祈禱。四姨丈臨離開前已領咗洗，做咗天主嘅子女，希望佢安息，好好保祐四姨同michelle，等佢哋好好繼續生活落去。Amen!